ԿԳ նախարարության կողմից իրականացված ստուգումների արդյունքում մասնավոր դպրոցներում բավական մեծ թվով թերացումներ են հայտնաբերվել, որոնք արագ կերպով շտկելու հրահանգ է իջեցվել: Այսօր կայացած քննարկման ժամանակ այս մասին հայտարարեց ԿԳՆ հանրակրթության վարչության պետ Նարինե Հովհաննիսյանը՝ հավելելով, որ թերացումների մասին ինքը տեղեկացել է այսօր առավոտյան՝ ստուգումների արդյունքում ստացված հաշվետվություններից:
«Միաժամանակ, չեմ համաձայնի այն կարծիքի հետ, որ միջնակարգ դպրոցները չեն ապահովում կրթության այն որակն, ինչ որ վճարովի, մասնավոր դպրոցները: Հատկանշական է, որ ինչպես հանրակրթական, այնպես էլ մասնավոր դպրոցները, առաջնորդվում են ԿԳՆ կողմից հաստատված միևնույն կրթական ծրագրերով: Ծնողն, իհարկե, այսօր դպրոցի և անգամ ուսուցչի մեծ ընտրություն ունի և կարող է իր երեխային ուղարկել այն կրթօջախ, որն իր համար ցանկալի է»,- ասաց նա՝ տեղեկացնելով, որ մի քանի մասնավոր դպրոցներ փակվել են, մյուսները, համոզված է, կփակվեն:
«Արազա» հասարակական բարեգործական կազմակերպության նախագահ Թամարա Աբրահամյանն իր հերթին նկատեց, որ մասնավոր դպրոցներում խնամի-ծանոթ-բարեկամ կապերն առավել ուժեղ են գործում, քան սովորական հանրակրթական դպրոցներում. «Ըստ էության, օրենքներ մշակելիս այլևս հասարակական հատվածին ներառելու քայլեր են արվում, և սա շատ լավ է: Միաժամանակ կարծում եմ, որ գերատեսչություններում հետադարձ կապի ինստիտուտը դեռևս լավ զարգացած չէ: Սա, իհարկե, ԿԳՆ-ին չի վերաբերում: Մենք նրանից պատասխաններ ստանում ենք. այլ հարց է, թե որքանով ենք պատասխաններով բավարարվում։
