Հատուկ քննչական ծառայությունը անհրաժեշտ է համարել քննել 2008թ. մարտի 1-ին Մաշտոցի պողոտայում այրված «ՎԱԶ-2106» մակնիշի մեքենայի վարորդին: Այս մասին այսօր լրագրողներին ասաց ՀՔԾ ղեկավար Անդրանիկ Միրզոյանը:
Նա նաև նշեց, որ Մարտի 1-ի հետ կապված բոլոր տեսագրություններն իրենք ունեն, և այժմ տարբեր տեղերում ցուցադրվող կադրերը մասնատված են և մեկնաբանվում են յուրովի. «Այդ փաստերը նախաքննության առաջին օրվանից մեր ձեռքի տակ եղել են, մենք տիրապետում ենք փաստերին, գիտենք ինչ է կատարվել այնտեղ, ամեն մի տեսագրություն մեր ձեռքի տակ եղել է»:
Միրզոյանը նաև նկատեց, որ պետք է մանրամասն ուսումնասիրվեն դեպքի վայրի զննությամբ հայտնաբերված փաստերը. «Դեպքի վայրը մի 20 քառակուսի մետր տարածք չէ, ամբողջ փողոցներ են, դրա համար շատ քննիչներ են անհրաժեշտ: Դեպքի վայրի զննությունը պետք է լինի իդեալական, դրա համար մենք նորից ենք նայում բոլոր հանգամանքները` ի՞նչ է ժամանակին զննվել, ո՞ր հատվածներն են զննվել, ի՞նչ չափի, ի՞նչ խորությամբ, զննման արդյունքում առգրավված իրերն ինչպե՞ս են գնահատվել, ի՞նչ փորձաքննության են ենթարկվել, և այս ամենը վերանայելով` հնարավոր կլինի նոր փորձաքննություն նշանակել, նոր անձանց հարցաքննել»:
