«Ամռան ամիսներին եթե մեկը խաշ կամ ճարպոտ խորոված ուտի՝ հաստատ կվատանա, ուստի պետք է խուսափել ծանր սննդից»,- լրագրողների հետ հանդիպմանը նշեց ՀՀ ԱՆ պետական հիգիենիկ և հակահամաճարակային պետական տեսչության վարակիչ և ոչ վարակիչ հիվանդությունների համաճարակաբանության բաժնի պետ Լիլիթ Ավետիսյանը:
Այս ամիսներին արևի վտանգավոր ազդեցությունից զերծ մնալու համար նա խորհուրդ տվեց հնարավորության դեպքում ժամը 12.30-ից 17-ը չգտնվել արևի ուղիղ ճառագայթների ներքո: Եթե հանգամանքների բերումով հնարավոր չէ, ապա անհրաժեշտ է գոնե պաշտպանվել հովանոցի կամ գլխարկի միջոցով: Ըստ Լիլիթ Ավետիսյանի՝ կարևոր է նաև հովանոցի գույնը: Պետք է խուսափել արևի ճառագայթները կլանող գույներից՝ սևից ու շագանակագույնից և օգտագործել սպիտակ, կապույտ, կարմիր: Սրանք անդրադարձնում են արևի ճառագայթները:
Բոլոր առողջ մարդկանց համար պարտադիր է խմել օրական մինչև 3 լիտր ջուր: Ջուրը պաշտպանում է մարդուն գերտաքացումից: Համաճարակաբանության բաժնի պետը խորհուրդ տվեց այս ամիսներին խուսափել խմորեղենից, ժամկետանց սննդից, սնունդն առանց սառնարանային պայմանների պահելուց: Աղցաններ պատրաստելիս բաղադրամասերը պետք է պահպանել սառնարանում՝ առանձին-առանձին, թթվասերի կամ մայոնեզի հետ խառնելիս թունավոր հարուցիչներ շուտ են առաջանում դրանցում:
«Ճաշը եփում ենք, 6-8 ժամ թողնում գազօջախին սենյակային ջերմաստիճանում, հետո ուտում: Սա արդեն վտանգավոր է»,- հավաստիացրեց Լիլիթ Ավետիսյանը:
Կարևոր է նաև ձեռքերը հաճախակի լվանալը: Տարվա բոլոր ամիսներին, բայց առավել ևս ամռանը պետք է հաճախակի լվանալ ձեռքերը, լվանալ միրգ-բանջարեղենը: Լիլիթ Ավետիսյանի կարծիքով՝ բոլորովին էլ կապ չունի, որ պտուղներ ձեր այգունն են, կարող է քամին ինչ-որ հարուցիչ բերած լինի:
«Այն ամենը, ինչ հնարավոր է, պետք է լվանալ»,- վստահեցրեց Լիլիթ Ավետիսյանը:
Այս տարի վարակիչ հիվանդությունների աճ չի գրանցվել: Պատկերը նույնն է, ինչ նախորդ տարիներին:
