News Georgia լրատվական գործակալության փոխանցմամբ` ՆԱՏՕ-ի գլխավոր քարտուղար Յենս Սթոլթենբերգը 2016 թվականի սեպտեմբերին կայցելի Վրաստան` մասնակցելու համար Հյուսիսատլանտյան խորհրդի նիստին:
Այդ մասին Վարշավայում կազմակերպված մամուլի ասուլիսի ժամանակ հայտարարել է հենց Սթոլթենբերգը. «Աշնանը ես Հյուսիսատլանտյան խորհրդի կազմում կլինեմ Վրաստանում: Դա Վրաստանին, նրա տարածքային ամբողջականությանը, անդամակցության ճանապարհին իրականացրած բարեփոխումներին մեր հզոր աջակցության ևս մեկ օրինակ է»,- հայտարարել է Սթոլթենբերգը:
Նախօրեին ՆԱՏՕ-ի գագաթնաժողովի շրջանակներում տեղի է ունեցել ՆԱՏՕ-Վրաստան հանձնաժողովի նիստը, որի արդյունքներով ընդունվել է 10 կետից բաղկացած փաստաթուղթ, որը նախատեսում է 2016 թվականի սեպտեմբերին Թբիլիսիում Հյուսիսատլանտյան խորհրդի նիստի անցկացում:
