Ռուսական RIA Novosti լրատվական գործակալության փոխանցմամբ՝ Վրաստանի նախագահ Գեորգի Մարգվելաշվիլին հայտարարել է, որ երկրի քաղաքական ուժերն ունակ են միավորվելու, երբ հարցն առնչվում է պետական շահերին:
Վրացական պատվիրակությունը Վարշավայում ընթացող ՆԱՏՕ-ի գագաթնաժողովի ժամանակ ներկայացրել էր միասնական հռչակագիր, որը ստորագրել էին Վրաստանի խորհրդարանում ներկայացված քաղաքական ուժերը:
Փաստաթղթում նշված էր, որ չնայած ներքաղաքական հարցերի շուրջ տարաձայնություններին՝ կուսակցությունները միասնական են երկրի ինքնիշխանության ու եվրոպական ժողովրդավարության ձգտումներում:
Մարգվելաշվիլին հայտարարել է. «Դա շատ կարևոր փաստաթուղթ է, որը ստորագրել են ինչպես իշխանամետ, այնպես էլ ընդդիմադիր ուժերը: Ես ցանկանում եմ շնորհավորել այդ կուսակցություններին. երբ հարցն առնչվում է արտաքին քաղաքական առաջնահերթություններին, երկրի շահերին, վրացական քաղաքական ուժերն ունակ են միավորվելու և հանդես գալու միասնական դիրքորոշմամբ»:
Փաստաթղթի տակ առկա են նաև Մարգվելաշվիլիի, վարչապետ Գեորգի Կվիրիկաշվիլիի ու խորհրդարանի նախագահ Դավիթ Ուսուպաշվիլիի ստորագրությունները:
