Ձեռներեցության հարցերով Եվրասիական տնտեսական հանձնաժողովի կոլեգիային կից խորհրդատվական կոմիտեի իններորդ նիստից հետո լրագրողների հետ զրույցում ՀՀ Էկոնոմիկայի նախարար Արծվիկ Մինասյանը նշեց, որ այս խորհրդատվական քննարկման հիմնական նպատակն այն է, որ հստակեցում մտցվի այն հարցերում, որոնք առաջացել են տեխնիկական կանոնակարգերի ընդունման, դրանց կիրառման, մեկնաբանման, անդամ երկրների առևտրի խթանման վերաբերյալ:
«Միասնական մոտեցում պետք է լինի: Եթե Ռուսաստանից որևէ ապրանք է ներմուծվում Հայաստան, որի շրջանակներում հայկական կողմը՝ հարկային մարմիններ կամ այլ ծառայություններ, կպահանջեն այնպիսի փաստաթղթեր, որոնք միասնական են, իրավունք չպետք է ունենան: Խոսքը, օրինակ, սերտիֆիկատների մասին է:
Կան առանձին հարցեր, որոնք կապված են հայկական ապրանքները ռուսական շուկայում կամ անդամ երկրների շուկայում իրացման հետ կապված, որի ժամանակ որոշակի դժվարություններ են առաջանում Հայաստանի արտադրողների կամ արտահանողների համար: Այսպիսի հարցերի քննարկումներն են, որոնք պետք է միասնական մոտեցում ձևավորեն, իջեցվի համապատասխան հանձնաժողովի կողմից անդամ երկրներին, որ ներքին օղակներին ասվի, որպեսզի ավելորդ վարչարարական միջամտություններ թույլ չտան, հնարավոր լինի ապրանքների առևտուրն իրականացնել առանց խոչընդոտի»,-նշեց Արծվիկ Մինասյանը:
Նախարարը հավելեց, որ կարևոր հարցերից մեկը, որը քննարկելու են` ԵՏՄ երկրներից դուրս ստեղծված ապրանքների` դեպի ԵՏՄ ներմուծմանն է վերաբերելու: Ինչ վերաբերվում է ԵՏՄ երկրների հետ սահման չունենալուն, ապա նախարարն ասաց, որ այդ հանգամանքն էականորեն դժվարացնում է այն հիմնական առավելություններից օգտվելու հնարավորությունը, որ կարող էր լինել միասնական սահմանի պարագայում:
ՀՀ էկոնոմիկայի նախարար Արծվիկ Մինասյանը` անդրադառնալով քաղավիացիայի ոլորտում գնագոյացման համակարգին, մասնավորապես այն հարցին, որ ավիատոմսերի գները շեշտակի բարձրացել են՝ նշեց. «Ինչ վերաբերում է ավիացիայի ոլորտում գնագոյացման համակարգին, սա մտահոգիչ է` նկատի առնելով հանգամանքը, որ էկոնոմիկայի նախարարությունը կարճ ժամանակ է, որ ստանձնել է այդ գործառույթը: Մենք թե կարողությունների հզորացման, թե համակարգի ավելի լավ ուսումնասիրման աշխատանքի մեջ ենք: Սա էկոնոմիկայի նախարարության և տնտեսական մրցակցությունը պաշտպանող հանձնաժողովի, ինչպես նաև այլ իրավասու մարմինների քննարկման հարցը պետք է լինի»:
Նա նշեց, որ ավիափոխադրումների ոլորտում գնագոյացման հնարավոր դեմպինգային գործողությունները բացահայտելու իմաստով անելիքներ կան, սպառողների իրավունքները պաշտպանելու համար կառավարությունը պետք է լուրջ վերանայումներ կատարի. «Պետք է ասել, որ սա խնդիր է նաև միջազգային փորձառության տեսանկյունից: Նույնիսկ զարգացած երկրները ավիափոխադրումների ոլորտում բախվում են թաքնված դեմպինգային գործողությունների, որի հետևանքը լինում են կա՛մ սպառողների իրավունքների խախտումները, կա՛մ շուկայում մրցակցային վիճակի խաթարումը»:
Մանրամասները՝ տեսանյութում:
