Կենսաթոշակային պարտադիր կուտակային համակարգի ներդրման վերաբերյալ օրենսդրական փաթեթը շուտով կներկայացվի ԱԺ երկրորդ ընթերցմանը: Այս մասին լրագրողների հետ հանդիպմանը նշեց աշխատանքի և սոցիալական հարցերի փոխնախարար Արտեմ Ասատրյանը` չմասնավորեցնելով կոնկրետ ժամկետներ: Փոխնախարարը նշեց, որ նախագծի փաթեթը առաջին ընթերցմամբ ընդունվելուց հետո իրենք ստացել են մոտ 300 առաջարկ, որոնք այժմ վերջնական քննարկման փուլում են: «Առաջին լրատվական»-ի այն հարցին, թե՝ ընդդիմադիր հիմնական երեք ուժերից (ՀԱԿ, ՀՅԴ, «Ժառանգություն») ի՞նչ առաջարկներ կան, որոնք կարող են ընդունվել նախագիծը երկրորդ ընթերցման ներկայացնելիս, Ա. Ասատրյանը պատասխանեց, որ ՀԱԿ-ից ու ՀՅԴ-ից իրենք առաջարկներ չեն ստացել, իսկ «ժառանգությունը» 3-4 առաջարկ է ներկայացրել: «Առաջարկությունները տարբեր էին, վճարումների դրույքաչափերին վերաբերող առաջարկություններ կային: Պարզապես հիմա բոլորի բովանդակությունը հստակ չեմ հիշում, քանի որ 300 առաջարկի մեջ դժվար է առանձնացնել, թե որն է ընդդիմությանը: Ի վերջո, մենք ամբողջական ենք նայում այդ առաջարկներին, և որը որ ընդունելի է կամ քննարկման ենթակա, քննարկում ենք»,- նշեց Ա. Ասատրյանը: «Առաջին լրատվական»-ի հարցին, թե ի՞նչը կարող է փոխված լինել երկրորդ ընթերցման ներկայացվող նախագծում` առաջին ընթերցմամբ ընդունվածի համեմատ, Ա. Ասատրյանը պատասխանեց, որ կոնցեպտուալ որևէ փոփոխություն չի լինի: «Քանի որ խնդիրը նոր համակարգի ներդրմանն է վերաբերում, աշխատանքն անընդհատ է: Ի վերջո, մենք չունենք այսօր պատրաստի լուծումներ, և չկա որևէ անձ, որ միանշանակ ասի` սա է վերջնական ու պարտադիր լուծումը: Կոնցեպտուալ առումով նախագծում փոփոխություններ չեն նախատեսվում: Բայց հաշվի առնելով, որ այս օրենքները լրիվ նոր դաշտի ձևավորում և լրիվ նոր համակարգ են ենթադրում, խնդիրները շատ-շատ են, և մենք փորձում ենք նախագիծը կատարելագործել»,- նշեց Ա. Ասատրյանը: Հիշեցնենք, որ ՀԱԿ-ն ու ՀՅԴ-ն բազմիցս հայտարարել են, որ իրենց համար ամբողջությամբ անընդունելի է կենսաթոշակային այս նոր համակարգը:
