Տավուշի մարզպետ Հովիկ Աբովյանի հետ հանդիպում կայացավ Տավուշի մարզի սահմանամերձ գյուղերի բնակիչների հետ: Հանդիպման ընթացքում քննարկվեց համայնքների խոշորացման հարցը: Այս մասին «Առաջին լրատվական»- ին տեղեկացրեց Ոսկեպարի գյուղապետ Երվանդ Եգանյանը:
Տավուշի մարզի բնակիչները համայնքների խոշորացման դեմ բողոքի ակցիաներ են իրականացնում: Մարզի մի շարք գյուղերի բնակիչներ հավաքվել են Նոբեմբերյանի քաղաքապետարանի շենքի մոտ ու փակել միջպետական ճանապարհը: Մասնավորապես, այս գործողությանը մասնակցել են սահմանամերձ Բարեկամավան, Կոթի, Ոսկեպար գյուղերի բնակիչները, ովքեր կտրուկ դեմ են արտահայտվում համայնքների խոշորացմանը: Գյուղացիները համաձայնել են բացել ճանապարհը, քանի որ նրանց վստահեցրել են, որ Ոսկեպար գյուղում իրենց հետ կհանդիպի և հարցերին կպատասխանի Տարածքային կառավարման և զարգացման նախարար Դավիթ Լոքյանը:
Ոսկեպարի գյուղապետ Երվանդ Եգանյանի հավաստմամբ՝ Տարածքային կառավարման և զարգացման նախարարի հետ հանդիպումը կայացել է, նախարարը բացատրել է, թե ինչ է համայնքների խոշորացումը, բնակչությունը մինչ այդ իրազեկված չէր: Երվանդ Եգանյանի խոսքով՝ հողովուրդը հակափաստարկներ է բերել, իր «ոչ»- ն ասել:
Ոսկեպարի գյուղապետ Երվանդ Եգանյանը համայնքների խոշորացման ծրագրի ռիսկերն է մատնացույց անում՝ գյուղը կառավարելու դժվարությունն իմացողի դիրքից։ Գյուղերում սոցիալական անհավասարություն, շահերի բախում է լինելու։
Գյուղապետը ծրագրի բացասական հետևանքի մասին խոսելիս զգուշավոր է. պաշտոնամոլի պիտակ կփակցնեն։
Մանրամասները՝ տեսանյութում: