Ազգային վճակագրական ծառայության տվյալներով, Հայաստանում 2010թ-ին 293,854 կով է հաշվառվել, որոնց գլխաքանկը 2009թ համեմատ 2.2%-ով ավելացել է: Գյուղնախարության անասնաբուծության եւ տոհմային գործերի վարչության պետ Աշոտ Հովհաննիսյանը մեզ հետ զրույցում նշեց, որ իրականում դա էական աճ չէ, քանի որ 4 տարի առաջ անասնաքանակը 350 հազարից ավել է եղել: «Վերջին 3 տարիների ընթացքում նկատվեցին աննշան նվազման միտումներ: Գյուղական վայերում բոլոր դեպքերում կաթի արտադրության անկում եղավ: Գլխաքանակի աճը ապահովեց ինչպես տեղական արտադրության, այնպես էլ արտերկրից ներկրվող տոհմային երինջների հաշվին: Միայն այս տարի մենք ներկրել ենք շուրջ 300 տոհմային երինջներ: Բացի այդ, մենք տարեկան ստանում ենք 500-ից ավել ներկրված երինջներից հորթեր, որոնք բացառապես օգտագործվում են վերարտադրության համար».- ավելացրեց Աշոտ Հովհանիսյանը: Նրա խոսքերով, յուրաքանչյուր կով տարեկան բերում է առնվազն 2 տոննա ապրանքային արտադրություն: Սակայն այսօր մեր կաթը չի բավականացնում մեր ազգաբնակչության պահանջներին: Կենսաբանական նորմայով յուրաքանչյուր շնչի օրական անհարաժեշտ է 1.5 լիտր կաթ կամ դրանից պատրաստված կաթնամթերք: Ինչը նշանակում է, որ տարեկան մեկ շնչի անհրաժեշտ է մոտավորապես 547 կգ կաթ, իսկ դա 3 միլիոն 200 հազար ազգաբնակչության համար անում է 1 միլիոն 800 հազար տոննա մինչդեռ մենք արտադրում ենք ընդամենը 650 հազար տոննա կաթ: Այսինքն՝ գրեթե 3 անգամ պակաս: Հետևաբար այսօր աշխատանքներ են տարվում՝ անասնագլխաքանակը շատացնելու ուղղությամբ: