ՀՀ Ազգային ժողովն այսօր վավերացրեց Հայաստանի և Ռուսաստանի միջև Հակաօդային պաշտպանության միավորված համակարգ ձևավորելու մասին համաձայնագիրը, որին կողմ են քվեարկել 102 պատգամավոր, դեմ՝ 8-ը: Դեմ քվեարկող պատգամավորներից է նաև Թևան Պողոսյանը:
Թևան Պողոսյանը «Առաջին լրատվական»-ի հետ զրույցում պարզաբանելով իր դիրքորոշումը՝ նկատեց. «Փաստաթղթի տեքստում եղած հնարավորությունները իրականում շատ լավն են, բայց ամեն անգամ խոսվում է ընդլայնվող հնարավորությունների մասին, սակայն չի ձևավորվում այդ հնարավորություններից օգտվելու վստահությունը: Բացի այդ, եզրափակիչ ելույթը շատ հակիրճ էր, և կարծես ցանկություն չկար փարատելու մտահոգություն հարուցող հարցերը, և ինձ մտահոգող հարցերը անպատասխան մնացին»:
Նրա խոսքով՝ իրեն մտահոգում է հատկապես այն հարցը, թե որ դեպքերն են պատերազմ ընկալվելու Ռուսաստանի կողմից և որ դեպքերը՝ Հայաստանի. «Ես համարում եմ, որ Ռուսաստանն իր վարքագծով ապացուցել է, որ մեր և Ռուսաստանի պատկերացրած պատերազմները տարբեր են լինելու: Ռուսաստանի կողմից պատերազմ կդիտարկվի միայն և միայն այն դեպքում, եթե որևէ վտանգ լինի հյուսիսային սահմանից վերև: Իսկ մեր սահմանի վրա ինչ էլ լինի՝ Ռուսաստանի կողմից չի ընկալվելու խնդիր: Ուստի ամեն ինչ մնում է բանավոր խոսքի շրջանակներում»:
Թևան Պողոսյանին մտահոգել է նաև այն հարցը, թե որն է լինելու այն հրամանատարական շղթան, որը ձևավորելու է մի յուրահատուկ համակախվածության խնդիր. «Մեր հրամանատարներն արդյոք դուխ ունենալո՞ւ են, թե՞ ոչ, կամ արդյոք մեր ռազմաքաղաքական հրամանատարությունը չի՞ հապաղելու»:
Ուստի Թևան Պողոսյանը կարծում է, որ «թղթի վրա ունենք դրական երևույթ, բայց չպետք է մոռանալ, որ Ռուսաստանի հետ ունենք երկկողմ այլ պայմանագրեր, որոնց շատ կետեր կյանքի չեն կոչվում: Այսինքն՝ հնարավորություն ունենք, բայց դրանից օգտվելու հարցը բաց է մնում»:
Անդրադառնալով այս համակարգից բխող մարտահրավերներին՝ Թևան Պողոսյանն ասաց. «Եթե ունենանք հարձակողական խնդիր՝ ուրեմն թիրախ ենք, բայց եթե ունենում ենք պաշտպանողական խնդիր, ինչպիսի՞ թիրախ պետք է լինենք՝ չէ՞ որ պաշտպանվում ենք: Ուստի մտավախություններս ավելի ատոմային հնարավորություններ ունեցող երկրներն են, որոնք Ռուսաստանի համար կարող են որևէ թիրախավորման խնդիր դառնալ: Օրինակ՝ Պակիստանի»:
Մանրամասները՝ տեսանյութում:
