Հունիսի 28-ին Աղավնաձորում տեղի է ունեցել «Արի տուն-2013» ծրագրի առաջին փուլի փակման հանդիսավոր արարողությունը:
Միջոցառմանը ներկա էին ՀՀ սփյուռքի նախարար Հրանուշ Հակոբյանը, ՀՀ վաստակավոր արտիստ, երգահան Արա Գևորգյանը, գրող, հասարակական- քաղաքական գործիչ Լիլիթ Գալստյանը:
Արիտունցիները ներկաներին ողջունել են ասմունքով, երգով ու պարով, իսկ վիրահայ Մարինա Շախտինարովայի կատարմամբ «Կռունկ» երգը զարմացրեց ու հուզեց ներկաներին:
Արիտունցիներին հայրենասիրական երգերով ոգևորել են «Հայկազունք» խմբի երգիչները, որոնց կատարումներին միացան նաև ծրագրի մասնակիցներն ու հյուրերը:
ՀՀ սփյուռքի նախարար Հրանուշ Հակոբյանը ողջունել է «արի տուն» կանչով հայրենիք եկած մասնակիցներին և հույս հայտնել, որ նրանք կդառնան յուրօրինակ կենդանի կամուրջ Հայաստանի և Սփյուռքի միջև. «Կարծում եմ, որ այս օրերին դուք շատ բան տեսաք ու սովորեցիք: Հույս ունեմ, որ հայրենիքի սերն ու ջերմությունը կտանեք ձեր համայնքներ և կոգևորե´ք, կբոցավառե´ք, ուժ կտաք համայնքում ապրող հայ երիտասարդներին, որ նրանք էլ գան հայրենիք, մասնակցեն ծրագրին, ձեզ պես ոգևորվեն ու շարունակեն հայ մնալ ու սիրել Հայաստանը»:
Երեկոն ավարտվել է ավանդական հրաժեշտի խարույկի մոտ, որի շուրջ մինչև ուշ երեկո պարում, երգում էին ծրագրի մասնակիցները, ովքեր մեկ օր հետո հրաժեշտ էին տալու հայրենիքին՝ նոր վերադարձի ակնկալիքով:
«Արի տուն» ծրագրի 2013թ առաջին փուլին մասնակցել է շուրջ 90 երիտասարդ աշխարհի 10 երկրից:
