«Իրական աշխարհ, իրական մարդիկ» ՀԿ-ն Հյուսիսային պողոտայում այսօր իրականացրեց «Հետազոտվի՛ր և ապրի՛ր» հանրային միջոցառումը, որի շրջանակներում քաղաքացիները տեղում կարող էին ստուգվել և պարզել իրենց ՄԻԱՎ կարգավիճակը:
«Իրական աշխարհ, իրական մարդիկ» ՀԿ-ի հանրային կապերի մասնագետ Անուշ Առաքելյանն «Առաջին լրատվական»-ի հետ զրույցում ասաց, որ վերջին շրջանում մարդիկ սկսել են ավելի շատ հետևել իրենց առողջությանը, որին նպաստում են նմանատիպ միջոցառումները:
«Առաջին լրատվական»-ի՝ Հյուսիսային պողոտայում գտնվելու ժամանակ շուրջ 30 քաղաքացի արդեն անցել էր հետազոտություն: Ինչպես փաստեց տիկին Առաքելյանը, քաղաքացիներն արդյունքների մասին կարող են տեղեկանալ 30 րոպեների ընթացքում:
World Vision կազմակերպության ՄԻԱՎ-ի կանխարգելման ծրագրի համակարգող Անուշ Սահակյանն էլ մեզ տեղեկացրեց, որ եթե հիվանդությունը հայտնաբերվում է ժամանակին, հնարավորություն է ընձեռվում հիվանդի կյանքի տևողությունը երկարացնել 30-40 տարով: Վաղ հայտնաբերումը նաև կարևոր է առողջ երեխաներ ունենալու համար:
Նշենք, որ ՀՀ ԱՆ ՁԻԱՀ-ի կանխարգելման հանրապետական կենտրոնի տվյալներով՝ 2013 թ. մայիսի 31-ի դրությամբ Հայաստանում գրանցվել է ՄԻԱՎ վարակի 1448 դեպք: Ընդհանուր թվով Հայաստանում կա 3500 ՄԻԱՎ վարակակիր:
ՄԻԱՎ-ի վերաբերյալ հետազոտությունը Հայաստանում անանուն է և անվճար:
Մանրամասները դիտեք տեսանյութում:
