Վերաքննիչ քրեական դատարանում ավարտվեց Աղավնի Ստեփանյանի վերաքննիչ բողոքի քննությունը:
Սյունիքի մարզի ընդհանուր իրավասության դատարանը Նապոլեոն Օհանյանի նախագահությամբ կապանցիներ Ստեփանյանին, Սողոմոնյանին և Սարգսյանին մեղավոր է ճանաչել պոռնկությամբ զբաղվելուն նպաստելու համար:
Նախաքննական մարմինը 59-ամյա Աղավնի Ստեփանյանին 2012 թվականի նոյեմբերի 9-ին մեղադրանք է առաջադրել ՀՀ քրեական օրենսգրքի 262 հոդվածի 2-րդ մասի 5-րդ կետով:
Ըստ մեղադրանքի՝ Աղավնի Ստեփանյանը, կապանցի մարմնավաճառներից միջնորդավճար ստանալով, 2005 թվականից մինչև 2012 թվականի նոյեմբերի 7-ը նպաստել է նրանց կողմից պոռնկությամբ զբաղվելուն:
Աղավնին միջնորդ է եղել մարմնավաճառների ու նրանց հաճախորդների միջև. ընդունել է «պատվերներ», կազմակերպելով հանդիպումներ, յուրաքանչյուր միջնորդության համար պահանջել ու ստացել 5 հազար դրամ:
44-ամյա Կոստյա Սողոմոնյանը ավելի համեստ «լումա» է ունեցել պոռնկությանը նպաստելու «ասպարեզում»:
Նա 2010 թվականից մինչև 2012 թվականի նոյեմբերի 7-ը եղել է Աղավնի Ստեփանյանի աջակիցը՝ նպաստել է պոռնկությամբ զբաղվելուն նպաստողին: Սողոմոնյանն իր անձնական օգտագործման «ՎԱԶ-2106» մակնիշի ավտոմեքենայով մարմնավաճառներին փոխադրել է տարբեր հյուրանոցային համալիր-անառակատներ, ինչպես նաև Աղավնի Ստեփանյանին է փոխանցել նրան հասանելիք միջնորդավճարները:
20-ամյա Վահե Սարգսյանը ևս Աղավնի Ստեփանյանի ձեռնարկած «գործի» մեջ է ներգրավվել: Նա, ըստ մեղադրանքի, հասցրել է միայն 2012 թվականի հոկտեմբերի 5-ին «կազմակերպել» մարմնավաճառների ու նրանց հաճախորդների հանդիպումը «Քարավան» հյուրանոցային համալիրում:
Ընդհանուր իրավասության դատարանում երեք ամբաստանյալներն էլ իրենց մեղավոր են ճանաչել: Գործը քննվել է արագացված կարգով:
Պատիժ նշանակելիս դատարանը նկատի է ունեցել, որ Աղավնի Ստեփանյանը նախկինում՝ 2001 թվականին մեկ անգամ դատապարտվել է համասեռ հանցագործության համար ու համաներման կիրառմամբ ազատվել պատժի կրումից, բայց անհրաժեշտ հետևություններ չի արել: Սողոմոնյանն ու Սարգսյանը նախկինում դատված չեն եղել:
Աղավնու «գործունեությունը» կրել է շարունակական բնույթ, նրա արարքի հանրային վտանգավորության աստիճանը, ըստ դատական ակտի, բարձր է եղել:
Ընդհանուր իրավասության դատարանը Աղավնի Ստեփանյանին վերջին հաշվով դատապարտել է 3 տարի 5 ամիս 27 օր ազատազրկման: Պատժի սկիզբը կհաշվվի Ստեփանյանին փաստացի արգելանքի տակ վերցնելու օրից:
Կոստյա Սողոմոնյանը և Վահե Սարգսյանը դատապարտվել են 3-ական տարի ազատազրկման: Նրանց նկատմամբ պայմանական դատապարտություն է կիրառվել: Սողոմոնյանի նկատմամբ նշանակվել է 2 տարի, իսկ Սարգսյանի նկատմամբ՝ 1 տարի փորձաշրջան:
Դատավճռի դեմ վերաքննիչ բողոք է բերել Աղավնի Ստեփանյանը՝ խնդրելով իր նկատմամբ սահմանված պատիժը նույնպես պայմանականորեն չկիրառել, իրական ազատազրկման չենթարկել՝ հաշվի առնելով իր տարիքն ու առողջական վիճակը: Աղավնի Ստեփանյանը վատառողջ է, երրորդ խմբի հաշմանդամ:
Դատարանում Աղավնու շահերի պաշտպանը ներկայացրեց ևս մեկ բժշկական տեղեկանք՝ իր պաշտպանյալի հիվանդությունների լիակատար ցանկով: Հայտնեց, որ Աղավնին գիտակցել է իր սխալները, այլևս այդ հանցավոր գործունեությամբ չի զբաղվի:
Ինքը՝ ամբաստանյալ Աղավնին էլ վատ լսողության պատճառով չէր կարողանում անմիջապես ու տեղին արձագանքել դատարանի հարցերին, բողոքում էր մեջքի անտանելի ցավերից: Նա ասաց, թե հաշմանդամության թոշակը ընդամենը 17 հազար դրամ է, դրանով ապրել չի լինում, իրեն մնում է առնվազն… չապրել: Ամբաստանյալի ներկայացրած «այլընտրանքը» դատարանին առանձնապես դուր չեկավ:
Աղավնին Կապանում միայնակ է ապրում, նրա դուստրն ու թոռները Ռուսաստանում են:
Վերաքննիչ քրեական դատարանը մերժեց պաշտպանական կողմի բողոքը և ընդհանուր իրավասության դատարանի դատավճիռը թողեց անփոփոխ:
Աղավնի Ստեփանյանը կալանքի տակ կառնվի վերաքննիչ դատարանի որոշումն ուժի մեջ մտնելուն պես:
