1992 թվականից Արծվաշեն գյուղից բռնի տեղահանված տիկին Սաթիկն այսօր Կառավարության շենքի առաջ բողոքի ցույցի մասնակիցների շարքում էր: Նա այստեղ էր եկել իր անչափահաս որդու հետ:
«Առաջին լրատվական»-ի հետ զրույցում նա նշեց, որ մինչև այսօր Քանաքեռ-Զեյթուն համայնքում վարձով է բնակվում, բազմաթիվ վիրահատություններ է տարել, և իր ուզածը միայն այն է, որ իր մահից հետո գոնե որդին մի բնակարան ունենա:
Տիկինը նշեց, որ բազմաթիվ վիրահատություններ է տարել, այլևս չի կարողանում վարձով՝ կոմունալ հարմարություններից զուրկ բնակարանում ապրել: Իր ծնողների գերեզմանը Արծվաշենում է, ինքն ու տղան էլ այստեղ միայնակ են՝ ամսական նպաստի հույսին:
Նա նաև նշեց, որ իրենց բնակարանից վտարելուց հետո ընդամենը 1000 դրամ փոխհատուցում են տվել, իսկ այսօր Կառավարության շենքի դիմաց ուզում էր հանդիպել Երևանի քաղաքապետ Տարոն Մարգարյանին և մի բնակարան խնդրել՝ թեկուզ հանրակացարանում: Սակայն տիկնոջն ու իր որդուն այդպես էլ չհաջողվեց հանդիպել նրան, քանզի քաղաքապետն ու հիմնականում բոլոր նախարարները ակցիայի մասնակիցներից խուսափելու համար հետնամուտքից են շենք մտնում:
