Երևան քաղաքի տարբեր վարչական շրջաններում գործում են շուրջ 20 բարեգործական ճաշարաններ: Այստեղ են այցելում մեծահասակներ, թոշակառուներ և հաշմանդամություն ունեցող մարդիկ, երբեմն նաև սոցիալապես անապահով ընտանիքների ներկայացուցիչներ: Սնունդը տրամադրվում է օրական մեկ անգամ, սովորաբար երկու տեսակի ճաշատեսակ՝ հացով, հյութով կամ թեյով:
Խնդիրը, սակայն, այն է, որ վարչական շրջաններից մեկում կարող է լինել 6 այդպիսի բարեգործական ճաշարան, իսկ մյուսում չլինի և ոչ մեկը:«Առաջին լրատվական»-ի հետ զրույցում քաղաքապետարանի լրատվության և հասարակայնության հետ կապերի պատասխանատու Արթուր Գևորգյանը ևս նշեց, որ այդպիսի ճաշարաններ ոչ բոլոր վարչական շրջաններում կան:
Օրինակ Նոր Նորք վարչական շրջանում գործում է 6 բարեգործական ճաշարան, մենք տեղեկացանք, որ դրանցից 5-ը պատկանում են առանձին մարդկանց՝ բարեգործների, իսկ մեկը ֆինանսավորվում է վարչական շրջանի թաղապետարանի կողմից: Քանաքեռ-Զեյթունում կա երեք նմանատիպ ճաշարան:
Մինչդեռ Նորք-Մարաշ, Նուբարաշեն վարչական շրջաններում այդօրինակ ճաշարաններ առհասարակ չկան. ասել է, թե այս թաղամասերում ծերեր, հաշմանդամներ կամ թոշակառուներ չեն բնակվում կամ էլ բոլորը սոցիալապես այնքան ապահով են, որ դրա կարիքը չկա էլ:
Մալաթիա վարչական շրջանում գործում է երկու բարեգործական ճաշարան, որոնցից մեկը ֆինանսավորում է Մայր Աթոռ Սուրբ Էջմիածինը, մյուսը՝ թաղապետարանը: Մենք պարզեցինք, որ այս երկու ճաշարաններից միասին օգտվում է մոտ 250 հոգի:
Ավան վարչական շրջանի ճաշարանն, օրինակ, ֆինասավորվում է «Առաքելություն» բարեգործական հիմնադրամի կողմից: Այստեղ օրական այցելում է մոտ 200 մարդ: Կազմակերպության աշխատակից Նուրիկ Դաղունցը «Առաջին լրատվական»-ի հետ զրույցում նշեց, որ այս պահին իրենք ֆինանսական խնդիրներ ունեն, պետության հետ բանակցություններ են վարում, որպեսզի ֆինանսավորում ստանան և էլ ավելի շատ մարդկանց կարողանան օգտակար լինել:
Աջափնյակ վարչական շրջանում ևս գործում է բարեգործական ճաշարան, որտեղ այցելող Արթուր պապը մեզ հետ զրույցում նշեց, որ ընդհանուր առմամաբ գոհ է ուտելիքից, համեղ են պատրաստում, պարզապես վատ է, որ օրը մեկ անգամ են սնունդ տալիս և տեղն էլ իր բնակության վայրից մի քիչ հեռու է:
Մնացած բոլոր վարչական շրջաններում գործում է մեկական ճաշարան, իսկ 2011 թվականի դեկտեմբերի 23-ից Էրեբունի վարչական շրջանում գործում է «Հանս Քրիստիան Կոֆոեդ» հիմնադրամի աջակցությամբ մի հանրակացարան, որտեղ հոգ են տանում անօթևանների մասին:
