ԵԽԽՎ հայաստանյան պատվիրակության նախկին ղեկավար Հովհաննես Իգիթյանը կարծում է, որ Եվրախորհդրի արտաքին գործերի նախարարների կոմիտեի նախագահի կարգավիճակ ստանալը Հայաստանի համար և՛ պարտավորություն է, և՛ հնարավորություն: Նա «Առաջին լրատվական»-ի հետ զրույցում, անդրադառնալով ադրբեջանամետ պատգամավորների՝ Հայաստանին նախագահությունից զրկելու պահանջին, նշեց, որ ոչ ոք չի կարող նման բան պահանջել, որովհետև դա հակասում է կանոնադրությանը:
Հ. Իգիթյանից հետաքրքրվեցինք, թե ինչպես պետք է օգտագործի այս ժամանակահատվածը Հայաստանը։ «Երբ որ զարգացած երկիր է նախագահում, այդ զարգացած երկիրը հնարավորություն ունի իր փորձն ավելի պատշաճ կերպով ներկայացնել ուրիշներին: Հայաստանի դեպքում ինձ թվում է, որ ժամանակաշրջանն ավելի շատ կլինի պատասխանատվություն: Ես հուսով եմ, որ Հայաստանը գոնե այս վեց ամսվա ընթացքում պետք է ցույց տա, որ Հայաստանում ավելի արագ ու խորն են գնում ժողովրդավարության բարեփոխումները: Ես չեմ կապում այս նախագահությունը Հայաստանում իրավիճակի հետ, դրանք լրիվ տարբեր բաներ են»,- ացաց նա:
Ճի՞շտ է արդյոք այնտեղ բարձրաձայնել Հայաստանի ներքաղաքական իրադարձությունները՝ հարցրեցինք պարոն Իգիթյանին՝ որպես օրինակ բերելով Լևոն Զուրաբյանի հնչեցրած մեղադրանքները ԱԳ նախարար Նալբանդյանի հասցեին։ «Ես գտնում եմ, որ ամեն մի քաղաքական գործիչ ինքն է որոշում իր քաղաքական գործունեության ձևն ու ոճը: Իմ կարծիքով՝ այսօր պահանջները բարձրացված խնդիրների շուրջ գտնվում են Հայաստանում։ Հայաստանում քաղաքական գործիչներն ավելի մեծ հնարավարություն ունեն շտկելու կամ բարձրացնելու այդ հարցերը, ավելի ճիշտ լուծում կարելի է գտնել Հայաստանում, քան ԵԽԽՎ-ում»,- պատասխանեց նա:
Հովհաննես Իգիթյանից հետաքրքրվեցինք նաև, թե կա՞ որևէ հարց, որ պետք է բարձրաձայնել, ինչպե՞ս պետք է ավելի արդյունավետ օգտագործել այս ժամանակահատվածը, վերջինս, մեր հարցադրմանն ի պատասխան, նշեց. «Ես մի քիչ գլոբալ պատասխանեմ: Հիմա ես գտնվում եմ Բրյուսելում՝ Եվրահանձնաժողովում, ես տեսնում եմ, որ այստեղ հետքրքրությունը Հայաստանի հանդեպ իջել է։ Դա կապված է կա՛մ հիասթափության, հետ կա՛մ Եվրահանձնաժողովը չի տեսնում Հայաստանի վրա ազդելու լծակներ: Ինձ թվում է՝ Հայաստանն ինքը պետք է փորձի շտկել իրավիճակը, գոնե օգտագործելով Եվրախորհրդում նախագահությունը՝ և՛ մարդու իրավունքների հետ կապված, և՛ տնտեսական զարգացումների հետ կապված և այլն, որ գոնե դրսից երևա, թե Հայաստանը փորձում է մի բան անել: Այստեղ հարգում են այն երկրները, որոնք փորձում են մի բան անել, բայց չի ստացվում, իսկ Հայաստանը, իմ կարծիքով, նույնիսկ չի էլ փորձում որևէ բան անել»:
Լուսանկարը՝ PanARMENIAN Photo-ի
