Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի վարույթում է 2001-2006 թվականներին ՀՀ արդարադատության նախարարության ՔԿՀ վարչության պետ, Երվանդ Զախարյանի նախկին խնամի Սամվել Հովհաննիսյանի գործի քննությունը:
55-ամյա Սամվել Հովհաննիսյանը 2013 թվականի փետրվարի 13-ին որպես մեղադրյալ է ներգրավվել ՀՀ քրեական օրենսգրքի 178 հոդվածի 3-րդ մասի 1-ին կետով և 38-35-104 հոդվածի 2-րդ մասի 7-րդ, 8-րդ կետերով նախատեսված արարքների կատարման համար:
Ըստ առաջադրված մեղադրանքի՝ Սամվել Հովհաննիսյանը Թելման Հովհաննիսյանի հիմնադրած, նրա տնօրինությամբ գործող «Սամոշ» ՍՊԸ-ում չունենալով գործարքներ կնքելու, նյութական միջոցներ տնօրինելու և այլ իրավունքներ՝ Երևան քաղաքի Մամիկոնյանց փողոցում կառուցվող բազմաբնակարանային շենքի երկու բնակարանների վերաբերյալ կնքել է կրկնակի գործարքներ և խարդախությամբ հափշտակել է այդ բնակարանների համար վճարված առանձնապես խոշոր չափերի գումարները:
Նշված շենքի 37-րդ բնակարանը նոտարական կարգով վավերացված նախնական պայմանագրով վաճառել է 22 միլիոն 995 հազար դրամով, իսկ չորս ամիս անց նույն բնակարանը դարձյալ նոտարական կարգով վավերացված նախնական պայմանագրով վաճառել է մեկ այլ քաղաքացու, ստացել ու հափշտակել է նրա 25 միլիոն 310 հազար 285 դրամ գումարը:
Նույն շենքի 1-ին բնակարանը, ըստ մեղադրանքի, Սամվել Հովհաննիսյանը նոտարական կարգով հաստատված նախնական պայմանագրերով վաճառել է երեք անգամ երեք տարբեր քաղաքացիների՝ հափշտակելով համապատասխանաբար՝ 13 միլիոն 300 հազար, 20 միլիոն և 20 միլիոն 094 հազար դրամ գումարներ:
Առաջադրված մեղադրանքի համաձայն՝ Սամվել Հովհաննիսյանը, չնայած վերը հիշատակված մոտ հարյուր միլիոն դրամի հափշտակմանը, շարունակել է գտնվել «ֆինանսական դժվարին վիճակում» և իմացել է, որ ՌԴ Նովոսիբիրսկ քաղաքում բնակվող Մրազ Շառոյանը վրեժի հողի վրա մտադրվել է պատվիրել իր եղբորը սպանած, «Գորիս» քրեակատարողական հիմնարկում պատիժ կրող դատապարտյալ Սլոյանի սպանությունը:
Քրեակատարողական հիմնարկների նախկին ղեկավար Սամվել Հովհաննիսյանը համաձայնել է սպանության կատարող գտնել, միջնորդ հանդիսանալ վերջինիս ու սպանության պատվիրատուի միջև և իրեն լավ ծանոթ կալանավայրային միջավայրում սպանել տալ Սլոյանին:
Նա իմացել է, որ պատվիրատուն պատրաստ է սպանության կատարման համար վճարել 30 հազար դոլար: 2012 թվականի փետրվարին Հովհաննիսյանը դիմել է իր ծանոթ, նախկինում երկու անգամ դատապարտված Ռոբերտ Տոնոյանին՝ առաջարկելով 10 հազար դոլար վարձատրության դիմաց կազմակերպել և իրագործել Սլոյանի սպանությունը՝ վերջինիս «Դատապարտյալների հիվանդանոց» տեղափոխելու, նրան ուղարկվող թմրանյութը մահաբեր խտության հասցնելու, դրանով զոհին թունավորելու եղանակով:
Հովհաննիսյանն առաջարկել է վարձատրության դիմաց հանցագործության կատարմանը ներգրավել նաև «Դատապարտյալների հիվանդանոցում» գտնվող դատապարտյալ Արթուր Խուրշուդյանին:
Մի քանի օր անց Տոնոյանը տեղեկացրել է, որ Խուրշուդյանը համաձայն է 10 հազար դոլար վարձատրության դիմաց իրականացնել Սլոյանի սպանությունը:
Հովհաննիսյանը Տոնոյանին առաջարկել է միջոցներ ձեռնարկել Սլոյանին «Դատապարտյալների հիվանդանոց» տեղափոխելու համար՝ խոստանալով տրամադրել անհրաժեշտ գումարը:
Սպանության պատվերն իրագործելու շուրջ բանակցելու համար Սամվել Հովհաննիսյանը, ըստ մեղադրանքի, 2012 թվականի փետրվարի 27-ին հեռախոսային կապ է հաստատել Մրազ Շառոյանի հետ, պայմանավորվել ու փետրվարի 29-ին N 1863 չվերթով Երևանից մեկնել Մոսկվա:
«Շերեմետևո-3» օդանավակայանում նա հանդիպել է Նովոսիբիրսկից ժամանած Մրազ Շառոյանին, համաձայնության եկել սպանության իրագործման հարցում, հաջորդ օրը վերադարձել Երևան:
Տոնոյանի հետ հանդիպելով՝ Սամվել Հովհաննիսյանը Տոնոյանին հայտնել է, որ Սլոյանին տեղափոխել են «Արթիկ» ՔԿՀ: Խնդրել է, որ Տոնոյանը պարզի՝ Խուրշուդյանը արդեն Հովհաննիսյանի «հեղինակած» եղանակով կարո՞ղ է այնտեղ կատարել Սլոյանի սպանությունը:
Շուտով Տոնոյանը տեղեկացրել է Խուրշուդյանի պատրաստակամության մասին:
Սամվել Հովհաննիսյանը Տոնոյանին առաջարկել է սակարկել Խուրշուդյանի հետ, նրան տրվելիք 10 հազար դոլարը պակասեցնել, տարբերությունը կիսել միմյանց միջև: Որոշ ժամանակ անց Խուրշուդյանը տվել է համաձայնությունը՝ Սլոյանի սպանությունն իրագործել 7500 դոլարով:
Սամվել Հովհաննիսյանը հեռախոսային կապ է պահպանել Մրազ Շառոյանի հետ: Գաղտնիության նկատառումներով կապը պահպանել է Երևան քաղաքի տարբեր վայրերում տեղակայված քարտոֆոնների միջոցով: Պայմանավորվել են, որ գումար փոխանցողը և ստացողը գործի հետ կապ չունեցող այլ մարդիկ են լինելու:
2012 թվականի ապրիլի 10-ին այդ ձևով Ռուսաստանից փոխանցվել է 5 հազար դոլար: Գումարը ստացած անձը այն փոխանցել է Սամվել Հովհաննիսյանին: Վերջինս Տոնոյանի միջոցով Խուրշուդյանին է հանձնել 400 դոլար կանխավճար՝ գործի համար անհրաժեշտ թմրանյութ ձեռք բերելու համար:
Ինքը՝ Հովհաննիսյանը, 2012 թվականի ապրիլի 28-ին մեկնել է Մոսկվա, այնտեղից մի քանի անգամ հեռախոսով խոսել է Խուրշուդյանի հետ՝ հանդես գալով որպես սպանության պատվիրատու՝ մտացածին «Սլավիկ» անունով: Նա հաստատել է պատրաստակամությունը՝ վճարելու պայմանավորված ամբողջ գումարը՝ սպանության իրագործման համար:
Սակայն Սամվել Հովհաննիսյանի կամքից անկախ պատճառներով Սլոյանի սպանությունն այդպես էլ չի իրագործվել, քանի որ Տոնոյանն ու Խուրշուդյանը կամովին դադարեցրել են սպանության նախապատրաստությունը, որի մասին հաղորդում է ներկայացվել ՀՀ ԱԱԾ:
Սամվել Հովհաննիսյանը գտնվում է կալանքի տակ:
ՔԿՀ վարչության նախկին պետ, Երվանդ Զախարյանի նախկին խնամի Սամվել Հովհաննիսյանը նախկինում այլ գործերով էլի է կալանավորվել, բայց անազատությունը երկար չի տևել:
2007 թվականի հունիսի 27-ին Մոսկվայի Վիննիցայի փողոցում առևանգվել էր Ռուբիկ Սիմոնյանը: Նրա հարազատներից պահանջել էին 300 հազար դոլար փրկագին: Գումարը վճարվել էր, առևանգված Սիմոնյանը ազատ էր արձակվել: Այս գործով Սամվել Հովհաննիսյանին մեղադրանք էր առաջադրվել մարդու առևանգման համար՝ ՀՀ քրեական օրենսգրքի 131 հոդվածի 3-րդ մասի 1-ին կետով: Սակայն քրեական գործը կարճվել էր՝ ապացույցների անբավարարության պատճառով:
2006 թվականի մայիսի 20-ին «Նուբարաշեն» ՔԿՀ-ի բուժմասի լոգարանում կախվելու միջոցով ինքնասպան էր եղել կալանավոր Նիկոլայ Ս.-ն: Նա ցուցմունքներ էր տվել մի շարք բարձրաստիճան պաշտոնյաների կողմից չարաշահումների կատարման, պետությանը մոտ հինգ միլիարդ դրամի վնաս պատճառելու գործով: Սամվել Հովհաննիսյանը կալանքի տակ էր առնվել, բայց շուտով ազատվել էր ու հայտարարել, թե խորապես վիրավորված է, որ իրեն կալանավորել են «երկու-երեք տականքների» ցուցմունքներով: Ինքը հանցագործ չէ ու հանցագործ չի եղել…
Ահա, կալանավայրերի նախկին ղեկավար Սամվել Հովհաննիսյանը դարձյալ կալանավորված է, մեղադրվում է ծանր հանցագործությունների համար:
Ըստ երևույթին, դատարանների համար շատ «անհարմար» գործ է Հովհաննիսյանի գործը: Այն 2013 թվականի մայիսի 30-ին մակագրվել է Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի դատավոր Արմեն Խաչատրյանին:
Հունիսի 3-ին որոշում է կայացվել գործն ըստ ընդդատության Կենտրոն և Նորք-Մարաշ վարչական շրջանների ընդհանուր իրավասության դատարան ուղարկելու մասին:
Հունիսի 7-ին գործը ստացել է Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանը: Բայց անմիջապես էլ գործը վերստին ըստ ընդդատության ուղարկվել է Արաբկիր ու Քանաքեռ-Զեյթուն վարչական շրջանների ընդհանուր իրավասության դատարան:
Հունիսի 11-ին գործը դարձյալ մակագրվել է Արմեն Խաչատրյանին:
