Կատարի վարչապետ և արտգործնախարար Համադ բեն Ջասեմ Ալ-Թանին կլքի իր պաշտոնները՝ իշխանությունից էմիր, շեյխ Համադ բեն Խալիֆ Ալ Թանիի հեռանալուց հետո: Այս մասին հայտնում է RIA Novosti-ն՝ հղում անելով տեղի «Ալ-Խալիջ» թերթին:
Պարբերականի տվյալներով՝ նոր էմիր Թամիմ բեմ Համադ Ալ Թանիի օրոք կձևավորվի նոր կառավարություն, որում գործող վարչապետը չի լինի:
Շեյխ Համադ բեն Ջասեմը զբաղեցնում է Կատարի կառավարության ղեկավարի պաշտոնը 2007 թվականից, իսկ ԱԳՆ-ն նա գլխավորում է դեռևս 1992 թվականից: Նա համարվում էր պետության ներքին, արտաքին և տնտեսական քաղաքականության որոշակիացման գործում առանցքային գործիչ:
Կատարի էմիրն այսօր հեռացել է իշխանությունից՝ հօգուտ իր 33-ամյա որդու: Ժողովրդին հղված հեռուստաուղերձում նա հայտարարել է, որ ժամանակ է իշխանությունը փոխանցել երիտասարդ սերնդին: Նրա խոսքերով՝ նոր սերուդը ստեղծագործ է, էներգիայով լի և բավականին պատասխանատու՝ երկրի կառավարումն իր վրա վերցնելու համար:
