Ապրիլի 7-ին վիրավորված 18-ամյա շարքային Ռուբեն Առաքելյանը Թալիշի դիրքերից տեղափոխվել էր «Էրեբունի» բժշկական կենտրոն: Նա ստացել էր 4-րդ ողի կոտրվածք՝ ողնուղեղի վնասվածքով, ինչի հետևանքով անշարժացել էին նրա վերջույթները: «Էրեբունի» բժշկական կենտրոնի հետևողական աշխատանքի շնորհիվ Ռուբենը հունիսի 3-ին արդեն կարողանում էր, թեկուզ անկանոն, բայց շարժել ձախ ձեռքը:
Այսօր առավոտյան Ռուբեն Առաքելյանը մեկնել է Գերմանիայի Բոնն քաղաք՝ բուժումը շարունակելու: «Էրեբունի» բժշկական կենտրոնի գործադիր տնօրեն Միքայել Մանուկյանը «Առաջին լրատվական»-ի հետ զրույցում նշեց. «Ռուբենի վիճակը կայուն է: Տեղափոխվելուց առաջ նա գտնվում էր հոգեպես հանգիստ վիճակում: Ե՛վ Ռուբենը, և՛ Ռուբենի ծնողները մեծ հույսեր ունեն, որ Ռուբենը Գերմանիայից վերադառնալու է հնարավորինս վերականգնված»:
