Պարույր Հայրիկյանի դեմ մահափորձի գործով ավարտվեց Սամվել Հարությունյանի նախաքննական ցուցմունքների հրապարակումը մեղադրողի կողմից:
Ընդմիջման ժամանակ լրագրողների հարցերին պատասխանեց Պարույր Հայրիկյանը: Նա հայտնեց, թե նախաքննությունը, ցավոք, հարկ եղած ուշադրությունը չի դարձրել այն հանգամանքին, որ Ռուսաստանի ոմն քաղաքացի Վարդան Սեդրակյանին է փոխանցել հարյուր հազար դոլար: Հայրիկյանը պատրաստվում է միջնորդել, որ դատարան հրավիրվի այդ անձը և պարզաբանի, թե ինչ նպատակի համար է նման գումար փոխանցել Սեդրակյանին:
Կատարվածի մեջ Հայրիկյանը տեսնում է «ռուսական հետք». «Ես վերլուծություն կատարում եմ ոչ թե մեկ փաստից ելնելով, այլ իմ հիսնամյա գործունեության արդյունքում»,- ասաց Պարույր Հայրիկյանը:
Նա ասաց, որ ամբաստանյալների ասածները կարող են համոզիչ համարել միայն նրանք, ովքեր չեն հասկանում, թե ինչ է ամբաստանյալի կարգավիճակը: Մարդիկ մեղադրվում են ծանր հանցագործության համար և ամեն կերպ ձգտում են պաշտպանել իրենց: «Այս ամբաստանյալների նման պրիմիտիվ մարդիկ շատ կան, նրանք կարող են թեկուզ վաղը իրենց տուն գնալ: Ինձ համար կարևոր է կազմակերպիչների բացահայտումը… Ինչո՞ւ պետք է Վարդան Սեդրակյանը կալանքի տակ լինի, իսկ այն մարդիկ, որ ասում են, թե Հայրիկյանի վրա չեն կրակել՝ ազատության մեջ լինեն: Նրանք իրենց վտանգավորությամբ չեն տարբերվում Սեդրակյանից: Այս «վախեցնելու» գործողությունը ուղղված էր ոչ թե կոնկրետ Հայրիկյանի, այլ ամբողջ հայ ժողովրդի դեմ»,-ասաց Պարույր Հայրիկյանը:
Ընդմիջման ավարտից հետո Պարույր Հայրիկյանը միջնորդեց դատարան հրավիրել ու հարցաքննել Վարդան Սեդրակյանին Ռուսաստանից հարյուր հազար դոլար փոխանցած երևանաբնակ հայր և որդի Աբրահամյաններին: Նրանց վերաբերյալ տվյալներ են ձեռք բերվել նախաքննության ընթացքում:
Միջնորդության դեմ առարկեցին բոլորը: Մեղադրողն ասաց, որ եթե այդ անձինք կարևորություն ներկայացնեին գործի համար, նախաքննական մարմինը նրանց կդատակոչեր:
Դատարանը մերժեց Պարույր Հայրիկյանի միջնորդությունը:
Պաշտպան Սիրունյան. չկա որևէ ապացույց, որ Վարդան Սեդրակյանն առնչություն ունի Պարույր Հայրիկյանի վրա արձակված կրակոցների գործին: Նման ապացույցներ չեն հետազոտվել: Սեդրակյանի գրասենյակից առգրավված թերթը՝ խզբզոցով, դժվար թե նրա մեղքը հիմնավորող ապացույց համարվի:
Պաշտպանը թվարկեց հակասություններ՝ կապված կրակոցների հետ: Ըստ պաշտպանի՝ միջնադարյան դատավարությունից քսանմեկերորդ դարի դատավարությունը պետք է տարբերվի նրանով, որ միայն նախաքննական ցուցմունքը ապացույց չհամարվի մարդուն մեղադրելու համար:
Հետազոտված ապացույցները, պաշտպան Սիրունյանի կարծիքով, Սեդրակյանին չեն վերաբերում: Դրանք թերի կամ անթույլատրելի լինելով՝ Սեդրակյանին չեն վերաբերում: Ունենք խնդիր. Սեդրակյանը կալանավորված է, և արդեն պարզ է, որ կալանավորված է անտեղի: Չկա նաև դատավարական անհրաժեշտություն Սեդրակյանին կալանքի տակ պահելու համար:
Ամբողջ ունեցվածքի գրավը պակաս երաշխիք չէ, որ մարդը չի խուսափի ներկայանալուց: Իսկ Սեդրակյանը բավական ունեցվածք ունի: Ինչո՞ւ պիտի փախչի մեկը, ում վերաբերյալ ապացույցներ չկան: Փախչի, որ կասկա՞ծ հարուցի: Սեդրակյանը բացասական չի բնութագրվում: Նա հիվանդություն ունի՝ խրոնիկական հեպատիտ: Սեդրակյանը ընտանիք ունի, երկու երեխա, նրա խնամքին է թոշակառու մայրը, նա ունի նաև մշտական բնակության վայր: «Սեդրակյանին մեղսագրվում է մի արարք, որի ապացույցները մենք այդպես էլ չհետազոտեցինք»,- ասաց պաշտպանը: «Սխալն ուղղելու համար» պաշտպանը միջնորդեց Սեդրակյանի խափանման միջոցը փոխել, կիրառել ազատազրկման հետ չկապված խափանման միջոց, իսկ դրա անհնարինության դեպքում կիրառել գրավը՝ որպես գրավ ընդունելով նրա ամբողջ ունեցվածքը:
Սեդրակյանը միացավ պաշտպանի միջնորդությանը: Նա հավելեց, որ եթե ինքը խուսափի, թաքնվի, ուրեմն կհակասի իր դիրքորոշմանը, կապացուցի, որ մեղք ունի: Ըստ Սեդրակյանի՝ իր ձերբակալման պահին ինքը դեռ անձեռնմխելիության իրավունք ուներ, բայց չի դիմել եվրադատարան՝ Հայաստանի դեմ Եվրոպային չբողոքելու համար:
Ակնհայտ անմեղ մարդուն պահում են կալանքի տակ: «Եթե նույնիսկ ասել եմ՝ վախեցնել, վախեցնելու համար հոդված կա՞ քրեական օրենսգրքում: Իմ մեղքը մնում է այն, որ «Հայկական ժամանակ» թերթի վրա խազեր եմ արել:
Եթե ես կապ ունեի, կարող էի փախչել՝ տեսնելով, որ Հարությունյանին ու Պողոսյանին ձերբակալել է ԱԱԾ-ն: Ես չեմ խոչընդոտել նախաքննությանը՝ լինելով նախագահի թեկնածու և ունենալով անձեռնմխելիություն: Խնդրում եմ չմերժել միջնորդությունը, բոլոր նիստերին կմասնակցեմ, ես էլ մյուսների նման շահագրգռված եմ ճշմարտությունն իմանալու»,- հայտարարեց Վարդան Սեդրակյանը:
Պաշտպաններն ու ամբաստանյալները չառարկեցին:
Առարկեց մեղադրող Ամիրզադյանը՝ հայտարարելով, որ ապացույցներին գնահատական տալու իրավունք ունի դատարանը, իսկ հիմնավոր կասկածները Վարդան Սեդրակյանի վերաբերյալ վերացված չեն:
Պարույր Հայրիկյանի ներկայացուցիչն ու ինքը՝ Պարույր Հայրիկյանը, չառարկեցին միջնորդության դեմ: Նրանք հայտարարեցին, որ Հայաստանում այլընտրանքային խափանման միջոցների կիրառումը սակավադեպ է: Մինչդեռ կալանքը պետք է ծայրահեղ դեպքերում կիրառվի: Պարույր Հայրիկյանն ասաց, թե ինքը խափանման միջոց փոխելու միջնորդություն է անում նաև մյուս երկու ամբաստանյալների համար. թող իրենց ընտանիքների հետ լինեն ու, եթե նշանակվելու են երկարաժամկետ պատիժներ, թող վայելեն իրենց ընտանիքների ներկայությունը: «Թող բոլորն ազատ լինեն»,- ասաց Պարույր Հայրիկյանը:
Դատարանը հեռացավ ամբաստանյալ Վարդան Սեդրակյանի շահերի պաշտպան Ա. Սիրունյանի միջնորդությունը քննարկելու:
