Հորդանանյան հնագույն քաղաք Պետրայի տարածքում գիտնականները հայտնաբերել են նախկինում անհայտ ճարտարապետության հուշարձան։ Այս մասին հայտնում է National Geographic-ը։
Հսկա հարթակը բացահայտել է հնագետ Սառա Պարկակը, ով մասնագիտացած է տիեզերքից հնագույն հուշարձանների հայտնաբերման գործում։ Տեղանքը գտնվել է արբանյակային լուսանկարների միջոցով, սակայն վերջին փուլում կառույցն ուսումնասիրվել է տեղում։
Գիտնականների խոսքով՝ հարթակը երկարությամբ համեմատելի է օլիմպիական լողավազանի հետ, սակայն կրկնակի լայն է (56×49 մ)։ Այն գտնվում է հնագույն քաղաքի կենտրոնից 800 մետր հարավ, սակայն դրան նախկինում ոչ ոք ուշադրություն չի դարձրել։
Տարածքում նկատվում են սյուների և աստիճանների հետքեր։ Աստիճանների դիմաց կան փոքր շինություններ։ Այս կառույցների գործառույթները դեռևս հայտնի չեն, սակայն հնագետները վստահ են, որ դրանք ծառայել են քաղաքացիական կամ կրոնական ծեսերի համար։
Հարթակի մակերևույթին գտնվել են գանգեր, որոնք թվագրվում են մ.թ.ա. 2-րդ դարին։
