Sputnik լրատվական գործակալության փոխանցմամբ՝ Եվրախորհրդի ղեկավար Դոնալդ Տուսկը ակնկալում է, որ ԵՄ-ն շուտով որոշում կընդունի Վրաստանի քաղաքացիների համար վիզային ռեժիմի վերացման մասին։
Վրաստանի նախագահ Գեորգի Մարգվելաշվիլու հետ հանդիպումից հետո Տուսկը լրագրողների հետ զրույցում հայտարարել է, որ հանդիպման ժամանակ քննարկվել է վիզային ռեժիմի վերացման հարցը.
«Ինչպես գիտեք, նախորդ տարվա դեկտեմբերին Եվրահանձնաժողովը հաստատել է, որ Վրաստանը կատարել է պահանջվող բոլոր պայմանները դրական վերջնական որոշման համար, որը ես հավատում եմ, որ կընդունվի շուտով»։
Նա ընդգծել է, որ Վրաստանի քաղաքացիների համար ոչ վիզային ռեժիմ տրամադրելու մասին Եվրահանձնաժողովի առաջարկը ներկայումս քննարկվում է Եվրախորհրդարանում ու ԵՄ-ում։
Հունիսի սկզբին Reuters-ը, վկայակոչելով իր դիվանագիտական աղբյուրներին, հայտնեց, որ ԵՄ-ի երկրների պատվիրակությունները քննարկել են Վրաստանի համար վիզային ռեժիմի ազատականացման հարցը, սակայն հետաձգել են վերջնական որոշումը։
