Ծնողները հաճախ են օգնում իրենց երեխաներին տնային աշխատանքները կատարել, ընդ որում՝ դա չի վերաբերում միայն ցածր դասարանների աշակերտներին, այլ նաև՝ շրջանավարտներին: Սակայն մայրիկների ու հայրիկների օգնելու չափազանց մեծ ձգտումները կարող են ձախողվել։ Այս մասին է վկայում ֆրանսուհու պատմությունը, ով ցանկացել է իր դստեր փոխարեն հանձնել ավարտական քննությունը:
Փարիզի ոստիկանությունը ձերբակալել է 52-ամյա կնոջը, ով եկել է այն լսարան, որտեղ իր 19-ամյա դուստրը պետք է քննություն հանձներ: Ըստ Huffington Post-ի տվյալների՝ Քերոլայն Դ. անունով ներկայացած կինը սպորտային կոշիկներ և նեղ ջինս է հագել, դեմքին մի քանի շերտ կոսմետիկ միջոցներ քսել՝ ինչպես հետո պարզվել է, կնճիռները փակելու համար:
Ի դժբախտություն 52-ամյա «շրջանավարտի» այդ լսարանում եղել է այն ուսուցիչը, ով օրեր առաջ մեկ այլ քննություն է վերցրել նրա 19-ամյա աղջկանից: Նա կնոջն «ինքնակոչ» է անվանել, սակայն մյուս աշակերտներին չխանգարելու համար դպրոցի ղեկավարությանն ու ոստիկանությանը միայն երկու ժամ անց է հայտնել այդ մասին։
Ոստիկանները մտել են լսարան քննության ավարտին, և կնոջը կալանել են ապացույցները ձեռքին:
Չափազանց հոգատար մորը մեղադրել են կեղծարարության մեջ: Նա պնդել է, որ ցանկացել է բարձրացնել իր դստեր համար կարևոր անգլերենի քննության գնահատականը: Նրա դուստրը ևս իր վրա կզգա այդ չմտածված արարքի հետևանքները. նրան կարող են արգելել առաջիկա հինգ տարիների ընթացքում մասնակցել ցանկացած քննության:
