Պաղեստինի արտգործնախարար Ռիադ ալ-Մալիկին միջազգային հանրությանը կոչ է արել պատժել Իսրայելին, եթե նա խոչընդոտներ ստեղծի ֆրանսիական խաղաղ նախաձեռնության իրագործման համար։
Իսրայելը չի թաքցնում բացասական վերաբերմունքը Փարիզում մերձավորարևելյան խաղաղ գործընթացի ապաարգելափակման համար համաժողովի գումարման գաղափարի հանդեպ և պնդում է, որ պաղեստինիների հետ ուղիղ բանակցություններն այլընտրանք չունեն։
«Եթե Իսրայելն այն խափանելու փորձ ձեռնարկի, ապա միջազգային հանրությունը պետք է դիմի ՄԱԿ-ի ԱԽ՝ այդ առնչությամբ բանաձևերի համար, կամ առաջ շարժվի, ինչպես Ֆրանսիան է խոստացել, պաղեստինյան պետության ճանաչման ուղղությամբ»,-ասել է ալ-Մալիկին RIA Novosti-ի հետ զրույցում։
Անցած ուրբաթ Փարիզում կայացել է երեք տասնյակ երկրների ու կազմակերպությունների ներկայացուցիչների հանդիպումը, որը մեկնարկ է տվել մեծ ֆորումի նախապատրաստությանը, որը կազմակերպիչները նախատեսում են անցկացնել մինչև տարեվերջ՝ երկու հակամարտող կողմերի մասնակցությամբ։
