Թուրքական Hurriyet Daily News թերթի փոխանցմամբ` Թուրքիայի զինված ուժերը պլանավորում են սահմանային գոտու անվտանգության միջոցներն արդիականացնել անօդաչու դիտարկման համակարգերի, այսպես կոչված՝ փոքր դիրիժաբլների օգնությամբ:
Համակարգը մշակել է Թուրքիայի պաշտպանական արդյունաբերության ոլորտի առաջատար ընկերություններից ASELSAN-ը: Այն նախատեսված է տեղական մոնիթորինգի ու վտանգի ակնթարթային իրազեկման համար:
Հաղորդվում է, որ տեսադիտարկման համակարգն ունակ է իրական ժամանակի ռեժիմով փոխանցել 360 աստիճան անկյուն տեսադաշտով լուսանկարներ: Համակարգը հագեցած է ցերեկային և գիշերային տեսախցիկներով: Բացի դրանից՝ այն ունակ է դիմանալ ուժգին քամուն և զինված թեթև հարձակումներին:
Համակարգը ներկայացված է երկու տարբերակով: Ջրի կաթիլի կամ դիրիժաբլի տեսքով մոդելի երկարությունը 16 մետր է, այն կարող է վեր բարձրանալ մինչև 1000 մետր: Մյուս մոդելն ունակ է վեր բարձրանալ մինչև 500 մետր: Թուրքական բանակն արդեն իսկ սկսել է սահմանային գոտում դրանց փորձարկումները:
