Հունիսի 2-ին Մոսկվայում մեկնարկած Հայաստանի Հանրապետության Ազգային ժողովի և Ռուսաստանի Դաշնության Դաշնային ժողովի միջև համագործակցության միջխորհրդարանական հանձնաժողովի 27-րդ նիստի շրջանակում հայկական պատվիրակությունը հանդիպել է ՌԴ Դաշնային խորհրդի նախագահի առաջին տեղակալ Նիկոլայ Ֆյոդորովի հետ:
Հանդիպման ընթացքում հայ խորհրդարանականներն անդրադարձել են տարածաշրջանում առկա լարված իրավիճակի և Ադրբեջանի կողմից սանձազերծված ապրիլյան ագրեսիային առնչվող իրադարձություններին` վերահաստատելով հայկական կողմի դիրքորոշումը, որ հակամարտությունը չունի և չի կարող ունենալ ռազմական լուծում. անթույլատրելի է Ադրբեջանի՝ խնդիրը բացառապես խաղաղ ճանապարհով լուծելու և միջազգայնորեն ստանձնած պարտավորությունները մերժելու ցանկացած փորձ:
ՀՀ ԱԺ փոխնախագահ Հերմինե Նաղդալյանը, ռուս գործընկերոջը ներկայացնելով Ադրբեջանի կողմից սանձազերծված ապրիլյան ռազմական ագրեսիայի մանրամասները, ընդգծել է, որ Հայաստանն անթույլատրելի է համարում մերժումը` հակամարտության բացառապես խաղաղ, քաղաքական միջոցներով լուծման հանձնառությունները, հատկապես, որ այս ռազմական ագրեսիայի զոհեր են անմեղ քաղաքացիներ, այդ թվում` երեխաներ: Տիկին Նաղդալյանն այս համատեքստում կարևորել է միջազգային հանրության հասցեական և հստակ գնահատականները:
ՀՀ ԱԺ փոխնախագահը գործընկերոջը հիշեցրել է Վիեննայում մայիսի 16-ին ԵԱՀԿ Մինսկի խմբի արտգործնախարարների նախաձեռնությամբ տեղի ունեցած երկու երկրների նախագահների հանդիպման մասին, որի ընթացքում պայմանավորվածություններ են ձեռք բերվել վստահության ամրապնդման միջոցառումների՝ շփման գծում մշտադիտարկման և միջադեպերի հետաքննության մեխանիզմների հաստատման ուղղությամբ, որոնք, սակայն, ադրբեջանցի պաշտոնյաները Վիեննայի հանդիպմանը հաջորդած իրենց հայտարարություններում փորձել են հերքել, ինչն աներկբա վկայությունն է Բաքվի որդեգրած` հակամարտության լուծման ռազմական կուրսին հավատարիմ մնալու քաղաքականությունը:
Երկուստեք կարևորվել է հայ-ռուսական միջխորհրդարանական հանձնաժողովի ակտիվ, համակարգված և հետևողական աշխատանքը, որն իրականացվում է տարին երկու անգամ օրակարգային հարցերի շուրջ հանդիպումներով:
Կողմերն ընդգծել են, որ մշտապես հաջողվել է տնտեսական, սոցիալական, ռազմաքաղաքական և մարդասիրական համագործակցության կարևորություն ներկայացնող խնդիրները պահել ուշադրության կենտրոնում: Վերջին մի քանի տարիների ընթացքում հանձնաժողովը շեշտը դրել է Ռուսաստանի և Հայաստանի մարզերի տնտեսական համագործակցության վրա:
Հանդիպման ընթացքում ելույթ են ունեցել միջխորհրդարանական հանձնաժողովի համանախագահ Նիկոլայ Ռիժկովը և ՌԴ Դաշնային խորհրդի անդամ Իգոր Չերնիշենկոն` ներկայացնելով միջխորհրդարանական հանձնաժողովի 27-րդ նիստի աշխատանքները, որի առաջին մասն անցկացվելու է Մոսկվայում և օրակարգում անդրադարձ է կատարվելու Լեռնային Ղարաբաղի հակամարտության զարգացումներին, իսկ երկրորդ մասը` Կազանում և առնչվելու է տնտեսական համագործակցության զարգացման հնարավորություններին:
Հայ և ռուս խորհրդարանականները միմյանց փոխանցել են ՌԴ Դաշնային խորհրդի նախագահ Վալենտինա Մատվիենկոյի և ՀՀ ԱԺ նախագահ Գալուստ Սահակյանի ողջույնները, ովքեր հաջողություն են մաղթել միջխորհրդարանական հանձնաժողովի 27-րդ նիստի աշխատանքներին: