Անգլիայի բանկը հինգշաբթի հրապարակել է 5 ֆունտ արժողությամբ նոր թղթադրամի դիզայնը՝ հայտնում է BBC-ի ռուսական ծառայությունը: Թղթադրամի դիմային մասում պատկերված է նախկին վարչապետ Ուինսթոն Չերչիլը, հետևի մասում՝ Եղիսաբեթ II թագուհին:
Նոր թղթադրամը կլինի պլաստիկե՝ թղթադրամների նման, որոնք օգտագործվում են Ավստրալիայում, Կանադայում, Բրունեյում, ևս մի շարք երկրներում: Բանկում նշում են, որ դա կօգնի պայքարել թղթադրամ կեղծողների դեմ և յուրաքանչյուր թղթադրամի օգտագործման ժամկետը կերկարացնի մինչև 5 տարի:
Խոսելով նոր թղթադրամների բացասական կողմերի մասին՝ բանկում ասել են, որ նոր թղթադրամները սկզբում, ըստ ամենայնի, կխփվեն դրամապանակում:
Նոր թղթադրամը նվիրված է բրիտանացի հանրահայտ վարչապետ Ուինսթոն Չերչիլին և 1940թ. մայիսի 7-ին Բրիտանիայի խորհրդարանի Համայնքների պալատում նրա ելույթին: Չերչիլի դիմանկարի կողքին թղթադրամի վրա պատկերված է հատված նրա ելույթից՝ «Ես ոչինչ չունեմ առաջարկելու (բրիտանացիներին)՝ բացի արյունից, ծանր աշխատանքից, արցունքներից և քրտինքից»:
Նոր թղթադրամը շրջանառության մեջ կդրվի սեպտեմբերի 13-ին: Փորձագետները նշում են, որ բանկոմատներն ու դրամարկղերը նոր թղթադրամին հարմարեցնելու համար բանկերի և խանութների տերերը պետք է ծախսեն ընդհանուր առմամբ մոտ 200 մլն ֆունտ (մոտ 290 մլն դոլար):
