Բնակարանի պատուհանից ընկած հնգամյա տղան հրաշքով փրկվել է: Երեխայի կյանքը փրկել է օդորակիչը, որից նա կախվել է:
Այն բանից հետո, երբ տղան մնացել է օդորակիչի և շենքի պատի արանքում, փրկարարական աշխատանքներին միացել են հարևանները: Միջադեպը տեղի է ունեցել Չինաստանի Շիշի քաղաքում:
Տղամարդն իր քնած որդուն մենակ թողել է տանը՝ հույս ուենալով, որ կհասցնի խանութ գնալ ու հետ գալ: Սակայն տղամարդը չի հասցրել մինչև երեխայի արթնանալը տուն վերադառնալ: Տղան արթնանալուց հետո հասկացել է, որ հայրը տանը չէ և բացել է պատուհանը՝ տեսնելու արդյոք նա բակում չէ՞:
Բարեբախտաբար, երեխան ընկնելով՝ հայտնվել է հարևան օդորակիչի և շինության պատի միջև, նրա ուսերը թույլ չեն տվել, որ նա ընկնի:
Ընդհանուր ջանքերով հարևանները կարողացել են փրկել երեխային: Այդ ամենի համար նրանցից պահանջվել է 40 րոպե:
Այս միջադեպը նման է մի քանի տարի առաջ Չինաստանում տեղի ունեցած մեկ այլ դեպքի, երբ երեքամյա երեխան ընկել էր պատշգամբից և նույնպես հայտնվել օդորակիչի ու պատի արանքում: Այդ երեխային նույնպես հաջողվել էր փրկել:
