Ռուսական RIA Novosti լրատվական գործակալության փոխանցմամբ՝ Իրանի նավթարդյունաբերության նախարար Բիջան Զանգանեն Վիեննայում լրագրողների հետ զրույցում հայտարարել է, որ Իրանում նավթի օրական արդյունահանման ծավալը կազմում է ավելի քան 3.8 միլիոն բարել:
«Մենք օրական արդյունահանում ենք ավելի քան 3.8 միլիոն բարել և ակնկալում ենք հասնել 4 միլիոն բարելի ցուցանիշին»,- ասել է նա:
Մայիսի սկզբին Իրանում նավթի օրական արդյունահանման ծավալը հասել էր 3.7 միլիոն բարելի: Իրանական ազգային նավթային ընկերության տնօրեն Ռուքնեդդին Ջավադին հայտարարել էր, որ երկիրը պատրաստ կլինի միանալ արդյունահանման ոլորտում ՕՊԵԿ-ի քվոտային քաղաքականությանը միայն 1-2 ամիս անց, երբ Իրանը հասած կլինի պատժամիջոցներից առաջ ունեցած նավթի արդյունահանման մակարդակին:
Ջավադին հավելել էր, որ Իրանը մինչպատժամիջոցային մակարդակ հանդիսացած օրական 4 միլիոն բարել նավթի արդյունահանմանը կհասնի ընթացիկ տարվա հուլիսին:
