Ցինցինատի քաղաքի (Օհայո նահանգ) կենդանաբանական այգու աշխատակիցները այլ ելք չեն ունեցել, քան սպանել գորիլայի արուին՝ նրա վանդակն ընկած երեխային փրկելու համար: TASS-ի հաղորդմամբ՝ այս մասին Նյու Յորքում լրագրողների հետ զրույցում ասել է ԱՄՆ նախագահի թեկնածու Դոնալդ Թրամփը:
Թրամփի խոսքով՝ կենդանին սկզբում փոքրիկին վերաբերվել է «գրեթե ինչպես մայրն իր երեխայի հետ», բայց հետո սկսել է նրան քարշ տալ վանդակով: «Ընտրությունը բարդ է եղել, բայց ելք առանձնապես չի եղել»,- ասել է հանրապետականը:
Շաբաթ օրը կենդանաբանական այգու աշխատակիցները սպանել են 17 տարեկան արու գորիլային՝ Խարամբեին, երբ նրա վանդակում է հայտնվել 3-ամյա տղան: Կենդանին բռնել է երեխային և մոտ 10 րոպե սկսել քարշ տալ վանդակով մեկ:
Երեխան հոսպիտալացվել է կյանքին վտանգ չսպառնացող վնասվածքներով:
Ամերիկյան հասարակության արձագանքը կատարվածին ոչ միանշանակ է եղել: Ոմանք կոչ են արել բոյկոտել կենդանաբանական այգին, մյուսները պահանջել են պատժել ծնողներին, որոնք իրենց երեխային առանց ուշադրության են թողել:
