ՀՀ վարչապետ Հովիկ Աբրահամյան. «Վերջին երկու տարիներին բախվել եմ բազմաթիվ քննադատության, որ կառավարությունը չի պայքարում մենաշնորհի դեմ: Թերությունն ուղղելու ժամանակն է: Հանձնարարում եմ էկոնոմիկայի նախարարին ամենասեղմ ժամկետում վերլուծել Հայաստանում առկա մենաշնորհը»։
Վարչապետի այս ելույթն ընդամենը երկու շաբաթվա վաղեմության է։ Էկոնոմիկայի նախարար Արծվիկ Մինասյանը Հովիկ Աբրահամյանից ստացած հանձնարարականը վերջնաժամկետից շուտ ավարտեց։ Մենաշնորհ համարվող ոլորտների թոփը նա անձամբ է թվարկում։
Այսօր արդեն Ազգային ժողովում դաշնակցական նախարարը չհապաղեց առաջարկել խնդրի լուծման իր բանաձևը. մենաշնորհի դեմ պայքարն իրականացնել մենաշնորհին օրենքի ուժ տալով։ Նախարարն առաջարկում է ոչ ավել-ոչ պակաս՝ շաքարավազի ներմուծան մենաշնորհին օրենքի ուժ տալ։
Շաքարավազի մենաշնորհն օրինականացնելու մասին Արծվիկ Մինասյանի առաջարկի նպատակը հասկանալու համար «Թրանսփարենսի ինթերնեշնլ» հակակոռուպցիոն կենտրոնի ղեկավար Վարուժան Հոկտանյանը մեծ ջանք գործադրեց։ Գտնված միակ բացատրությունն այս էր՝ այդպես թե՛ գառները ողջ կմնան, թե՛ գայլերը կուշտ կլինեն։
Շաքարավազի ներմուծման մենաշնորհի օրինականացումը եթե անգամ մի կողմից՝ սոցիալական հարց է լուծում, մյուս կողմից, սակայն, առաջացնում է տնտեսական անհավասար մրցակցության խնդիր։ Վարուժան Հոկտանյանի տրամաբանության մտքի թելը ցանկացած հաշվարկով է կտրվում։
Հայաստանի Երիտասարդ իրավաբանների ասոցիացիայի ղեկավար Կարեն Զադոյանն էլ օրենքն է մատնանշում, որը Հայաստանում կարգավորում է մենաշնորհային դաշտը։ Հղումը Սահմանադրության 56-րդ հոդվածն է. մրցակցության սահմանափակումը կարող է ստեղծվել օրենքով միայն հանրային շահերի պաշտպանության գերակայության դեպքում։
Շաքարավազ ներկրողին մենաշնորհ տրամադրելու հանրային շահի նպատակահարմարությունը պետք է որոշվի հանրային քննարկմամբ, հակառակ դեպքում խախտվում է ՀՀ քաղաքացու իրավունքը։
Մասնագետը շեշտում է՝ մենաշնորհի դեմ պայքարը պետք է իրականացնել ոչ թե փաստաթղթերով, այլ գործով։ Իրավաբանն առաջարկում է առաջին քայլով ոչ թե մենաշնորհն օրինականացնել, այլ քաղաքականությունն ու բիզնեսը տարանջատել։
Մենաշնորհի դեմն առնելու համար մենաշնորհն օրինականացնելու առաջարկը քաղաքական կամքի բացակայության հերթական վկայությունն է։ Քաղաքագետ Արմեն Գրիգորյանը նույնպես Հայաստանը Շվեյցարիայի հետ է համեմատում։ Իրավիճակից դուրս գալու համար պետք է փնտրել այլընտրանքային ելքեր: Սա է մասնագետների առաջարկը։
