ԱՄՆ-ի մարտական կորուստները՝ սկսած 2001 թվականի սեպտեմբերի 11-ից, երբ ահաբեկչական հարձակում կատարվեց Նյու Յորքի Առևտրի համաշխարհային կենտրոնի վրա, կազմել են ավելի քան 5000 մարդ։ Նման տվյալ է ներկայացրել երկրի Զինված ուժերի շտաբների պետերի կոմիտեի նախագահ, գեներալ Ջոզեֆ Դանֆորդը երկուշաբթի Արլինգթոնի ազգային գերեզմանատանը ծաղկեպսակներ դնելու արարողության ժամանակ։ Այս մասին հայտնում է TASS գործակալությունը։
Հիշատակի օրվա իր ելույթում Դանֆորդը նշել է, որ երկրի հիմնադրման օրից ընդհանուր առմամբ իրենց կյանքն են երկրի համար զոհել ավելի քան 1 մլն անձինք։
Մասնավորապես, 100 հազար զինվոր զոհվել է Առաջին համաշխարհային պատերազմում, 400 հազարը՝ Երկրորդ համաշխարհային պատերազմում։ Եվս 40 հազար ամերիկացիներ սպանվել են Կորեական թերակղզու հակամարտության ժամանակ։ Վիետնամական պատերազմի ընթացքում կորուստները կազմել են 58 հազար։
Հիշատակի օրն ամերիկացիներն առաջին անգամ նշել են 1868 թվականի մայիսի 30-ին՝ հարգանքի տուրք մատուցելով Հյուսիսի և Հարավի միջև քաղաքացիական պատերազմի զոհերին։ Այդ ժամանակ Արլինգթոնի գերեզմանատանը ծաղիկներով էր զարդարվել 20 հազար զինվորի գերեզման։ Առաջին համաշխարհայինից հետո մայիսի վերջին երկուշաբթին սկսել են հիշել ԱՄՆ-ի մասնակցությամբ բոլոր զինված հակամարտություններում զոհվածներին։
