Թուրքական Son dakika լրատվական կայքի փոխանցմամբ՝ ընդդիմադիր «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուն նամակ է հղել գերմանացի առաջնորդներին՝ կապված Հայոց ցեղասպանության խնդրի հետ։
Այդ մասին լրագրողներին հայտնել է հենց Քըլըչդարօղլուն՝ մանրամասնելով, որ նախորդ շաբաթ Գերմանիայի կառավարությանը հղած նամակում կոչ է արել չընդունել Հայոց ցեղասպանության ճանաչման մասին բանաձևը, որը Բունդեսթագը դիտարկելու է հունիսի 2-ին։
Քըըլըչդարօղլուն Թուրքիայի «մայր ընդդիմադիր» կուսակցության անունից զգուշացրել է, որ եթե Բունդեսթագն ընդունի այդ բանաձևը, ապա այն բացասաբար կանդրադառնա Գերմանիայի ու Թուրքիայի հարաբերությունների վրա՝ ստեղծելով մեծ խնդիրներ։
Քըլըչդարօղլուն կոչ է արել դադարեցնել տվյալ «սադրիչ» նախաձեռնությունը. «Կատարելապես անկասկած է, որ պատմություն գրելն ու մեկնաբանելը չի հանդիսանում և չպետք է լինի խորհրդարանների գործառույթների թվում։ Պատմական դեպքերը պետք է քննարկեն տվյալ ոլորտի մասնագետները՝ անկողմնակալ մեթոդներով ուսումնասիրելով պատմական փաստաթղթերն ու արխիվները։
Թուրքիան 2015 թվականի ապրիլի 10-ին Հայաստանին առաջարկել է ձևավորել պատմաբանների հանձնաժողով՝ քննելու համար 1915 թվականի դեպքերը։ Անկասկած է, որ դա քաջ քայլ է»։
Նամակի վերջնամասում Քըլըչդարօղլուն կոչ է արել մտածել Թուրքիայի ու Գերմանիայի հարաբերությունների ապագայի մասին։
