Ավելի քան 500 տուն է վնասվել Բաչատսկի ավանում: Ըստ նախնական տեղեկությունների՝ տները վնասվել են Կեմերովոյի մարզում այսօր տեղի ունեցած երկրաշարժի հետևանքով: Այս մասին հայտնում է RIA Novosti-ն՝ հղում կատարելով տեղի վարչակազմի ներկայացուցչին:
Ինչպես հաղորդում է ԱՄՆ Երկրաբանական ծառայությունը, 5.3 մագնիտուդով երկրաշարժը տեղի է ունեցել չորեքշաբթի՝ Երևանի ժամանակով ժ. 03.02-ին, Կեմերովոյի մարզի Բելովո քաղաքից 21 կմ հեռավորության վրա:
Ցնցումները զգացվելեն նաև Նովոսիբիրսկի մարզում:
«Նախնական տվյալներով՝ 500 տուն է վնասվել: Խումբը շարունակում է աշխատել: Կան տներ, որոնք ուժեղ վնասվել են, կան նաև թեթև վնասվածներ: Մեծապես վնասվել են այն տները, որոնց առաստաղներն են փլուզվել կամ պատերն են քանդվել»,- գործակալությանը ասել է վարչակազմի ներկայացուցիչը:
Նրա խոսքով՝ բնակիչների հետ աշխատում է հանձնաժողով, որը գնահատում է վնասված տները:
