«Ուղղակի հայտարարություն և անուղղակի ճնշում Ադրբեջանի վրա»,- «Առաջին լրատվական»-ի հետ զրույցում, անդրադառնալով «Մեծ ութնյակի» գագաթնաժողովում ԵԱՀԿ Մինսկի համանախագահող երկրների՝ Ֆրանսիայի, ԱՄՆ-ի, Ռուսաստանի նախագահների հայտարարությանը, կարծիք հայտնեց Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանը:
Նա նշեց, որ այս հայտարարությամբ «միջազգային համայնքը», այսինքն երեք համանախագահները խնդիրը չեն շարժելու, և ղարաբաղյան հակամարտության խաղաղ կարգավորման գործընթացքում ոչ մի փոփոխություն չի լինելու. «Գնդակն այլևս Հայաստանի և Ադրբեջանի դաշտում է և գլխավորապես՝ Ադրբեջանի: Ինչպես գիտենք, Հայաստանն անմիջապես արձագանքեց՝ համարյա թե ասելով, որ համաձայն է այդ հայտարարության հետ, Հայաստանն ամենաարագն արեց այդ հայտարարությունը, որպեսզի ճնշումը լինի Ադրբեջանի վրա, որպեսզի ամբողջ աշխարհը իմանա, թե Ադրբեջանն է խանգարում խաղաղ գործընթացին, և ոչ՝ Հայաստանը»:
Ըստ քաղաքագետի՝ սա սովորական և համարյա թե ոչինչ չասող հայտարարություն էր, բացառությամբ մեկ կետի. «Այսինքն ստատուս քվոն կպահպանվի, բայց մենք այլևս չենք շարժելու գործընթացը. համանախագահները դա էին ուզում ասել: Հիմա կարևոր է սպասել Ադրբեջանի արձագանքին՝ Ադրբեջանը կհամաձայնի՞ հայտարարության հետ, թե՞ ոչ, և եթե համաձայնի, ապա կարելի է կարևոր հանդիպումը Հայաստանի և Ադրբեջանի նախագահների միջև կամ արտգործնախարարների միջև: Սա է՝ ուղղակի հայտարարություն և անուղղակի ճնշում՝ գլխավորապես Ադրբեջանի վրա»:
Կայծ Մինասյանը հավելեց, որ Հայաստանի արտգործնախարարի հայտարարությունը ցույց է տալիս, որ Հայաստանը պատրաստ է խաղաղության՝ ըստ էության, բայց պետք է սպասել Ադրբեջանի հայտարարությանը, որը մինչ այժմ որևէ կերպ չի արձագանքել:
Հիշեցնենք, որ ԵԱՀԿ Մինսկի խմբում համանախագահող երկրների՝ ԱՄՆ-ի, Ֆրանսիայի և Ռուսաստանի նախագահներ Վլադիմիր Պուտինը, Բարաք Օբաման և Ֆրանսուա Օլանդը «Մեծ ութնյակի» գագաթնաժողովում ընդունել էին համատեղ հայտարարություն, որում հիմնականում ասվում էր, որ իրենք խորին ափսոսանք են հայտնում, որ բանակցային գործընթացում կողմերը, փոխադարձ շահերը հաշվի առնելու վրա հիմնված (ԼՂ հակամարտության) լուծումը գտնելու փոխարեն, շարունակել են ձգտել միակողմանի օգուտ ստանալուն: Նրանք անընդունելի են համարել դեպի համապարփակ խաղաղ կարգավորում տանող հավասարակշռված շրջանակային պայմանավորվածության հետագա ձգձգումը և Հայաստանի ու Ադրբեջանի առաջնորդներին կոչ են արել թարմ ուժերով կենտրոնանալ հարցերի լուծման վրա:
