«Առաջին լրատվական»-ի զրուցակիցն է ԵԿՄ փոխնախագահ Արա Կետիկյանը:
ԵԿՄ փոխնախագահ Արա Կետիկյանը, պարզվում է, ողջ օրը զբաղված է ազատամարտիկների սոցիալական խնդիրները լուծելով, իր խոսքերով` «օրական 50, 60, 100 ազատամարտիկների սոցիալական հարցեր» է լուծում, այդ իսկ պատճառով չի կարող իր գործը թողնել ու մասնակցել ազատամարտիկների հանրահավաքներին: Անհայտ է միայն, թե այդքանից հետո ինչո՞ւ են բողոքում ազատամարտիկները: ԱԺ-ում երեկ գեներալներ Մանվել Գրիգորյանի ու Սեյրան Սարոյանի հեղինակած «Երկրապահ կամավորականի կարգավիճակի մասին» և «Զինծառայողների և նրանց ընտանիքի անդամների սոցիալական ապահովության մասին» օրինագծերի քննարկման ժամանակ ԱԺ էին եկել նաև ԵԿՄ փոխնախագահները: ԵԿՄ-ականները խանդավառված էին օրինագծի ընդունումից հետո: Այսուհետ Արցախյան պատերազմին մասնակցած ազատամարտիկներն օրենքով կհամարվեն երկրապահ կամավորականներ: Հիշեցնենք, որ այս փոփոխությամբ չի լուծվում ազատամարտիկների բարձրացրած հիմնական խնդիրը` նրանց կենսաթոշակի հարցը: Արա Կետիկյանի խոսքերով` ԵԿՄ-ն 20 տարի զբաղվում է այս խնդրով, և ամեն ինչ մեկ օրում չի լուծվում: Արդյո՞ք ազատամարտիկները ևս 20 տարի պետք է սպասեն, որ խնդիրը լուծվի:
– Պարոն Կետիկյան, ընդունված օրինագիծը, փաստորեն, չի լուծում ազատամարտիկների հիմնական խնդիրը, նրանց հիմնական պահանջը` սոցիալական խնդիրը, չի լուծվում: Այս առումով` խանդավառությունը խորհրդարանում անհասկանալի էր:
– Սա առաջին քայլն է, և այդ մասին շեշտվեց և օրենքի հեղինակների, և համահեղինակների կողմից, և մեր կողմից է շեշտվել: Սա ընդամենը առաջին քայլն է, որին կհաջորդեն 2-րդ, 3-րդ, 4-րդ քայլերը` օրենքի փոփոխություններով, ենթաօրենսդրական ակտերով, անընդհատ աշխատանքով: Սա ընդամենը հիմքն է, որի վրա պետք է կառուցվի այն ամենը, ինչ անհրաժեշտ է այս խավերի համար: Ասեմ, որ աշխատանքներ այսօր էլ արվում են, պարզապես այս օրենքն անհրաժեշտ էր, և սա ունի նաև բարոյական նշանակություն բազմահազար երկրապահ-կամավորականների համար, որոնք չունեին մինչև օրս իրենց օրենքը: Խանդավառությունը կապված է նաև նրա հետ, որ արդեն որերորդ գումարման ԱԺ-ն է, որ մտածել է դրա անհրաժեշտության մասին, սակայն չի կարողացել ընդունել, և ողջունելի է, փառք ու պատիվ մեր այսօրվա պատգամավորներին, որ այսպես միաձայն ընդունեցին օրենքը:
– Փաստ է, որ օրենքը ընդունեցին, ծափահարեցին, սակայն ազատամարտիկների պահանջը և խնդիրները չլուծվեցին սրանով:
– Պահանջը և խնդիրները մի օրով չեն լուծվում: 20 տարուց ավել ԵԿՄ-ն նաև էդ խնդիրներով է զբաղվում, և մենք երբեք չենք ակնկալում, որ մեկ օրում ինչ-որ օրենքով կամ քայլով կարող են բոլոր խնդիրները լուծվել: Բոլոր խնդիրները լուծվում են ժամանակի ընթացքում: Ասել, որ օրենքի ուղղությամբ մեր պետությունը կամ մեր կազմակերպությունը ոչինչ չի արել` այդպես չէ, սակայն մենք պետք է աշխատանքները ակտիվորեն շարունակենք:
– Ճի՞շտ է, որ կառավարությունը մերժել է ազատամարտիկներին 80 հազար դրամ թոշակ սահմանելու ԵԿՄ առաջարկը:
– Ես տեղյակ չեմ:
– Իսկ ե՞րբ եք կոնկրետ բարձրացնելու կենսաթոշակների խնդիրը:
– Կենսաթոշակների բարձրացումը մեր ցանկությունից չի կախված: Վստահորեն կարող եմ ասել, որ եթե մեր ցանկությունից կախված լիներ կամ նույն կառավարության անդամների, ոչ թե 80 հազար կլիներ, այլ 800 հազար: Ամեն ինչ կախված է նաև հնարավորություններից: …Ցանկությունը կա, մենք պետք է ամեն ինչ անենք, որ էդ 80 հազարը մեր պետությունը գտնի և տա:
– Պարոն Կետիկյան, իսկ ինչո՞ւ Դուք այսօր ազատամարտիկների կողքին չեք և ազատամարտիկների պայքարին չեք միանում:
– Ես ազատամարտիկների կողքին եմ առավոտյան ժամը 7-ից մինչև գիշերվա 22-ը: Նման բան ինձ չասեք: Օրվա մեջ 100-200 ազատամարտիկի եմ հանդիպում:
– Բայց իրենց հանրահավաքներին չեք մասնակցում:
– Ես իրանց խնդիրներով եմ զբաղվում, և էդ հանրահավաք անող տղերքը` բոլորը իմ ընկերներն են: Հանրահավաքից ազատ ժամանակ հաստատ տարբեր խնդիրներով իմ մոտ են գալիս: Կարող եք իրենց հարցնել:
– Ասել է թե` համարում եք, որ հանրահավաքներին մասնակցելու կարիք չկա՞:
– Չէ՛, ես չեմ ուզում իրանց գնահատական տամ, կռվող տղերք են, էդ իրանց իրավունքն ա: Իմ խնդիրը կոնկրետ գործ անելն ա: Ես ԵԿՄ-ում օրական ամենաքիչը 50, 60, 100 ազատամարտիկներ եմ ընդունում և իրանց սոցիալական խնդիրներով զբաղվում: Էդ թվում` էսօրվա միտինգ անող ազատամարտիկների, որոնց մեծ մասը իմ շատ լավ ընկերներն են:
– Թե՞ մտածում եք` կարող է ԵԿՄ ղեկավարության հետ խնդիրներ ունենաք:
– Չէ՛, ես ԵԿՄ-ում խնդիրներ չեմ ունենում, ես ինքս եմ ԵԿՄ ղեկավարությունը, իսկ եթե դուք պատկերացնում եք, որ ես էդ 100 հոգուն, որ կարող եմ օրվա մեջ սոցիալական խնդիրները լուծեմ, պետք ա թողնեմ, գնամ նստացույց անեմ, չէ՛, ես տենց չեմ պատկերացնում իմ աշխատանքը:
– Իսկ հնարավո՞ր է` մտավախություն ունեք, որ Ձեր բիզնեսի վրա դա կարող է վատ անդրադառնալ, եթե մասնակցեք հանրահավաքներին:
– Չէ՛, նման մտավախություն չունեմ, ես շատ օրինապահ բիզնեսմեն եմ նաև: Որևէ հարկային և այլ պարտավորություններից երբեք չեմ խուսափել: Եվ իմ կամքի արտահայտումը որևէ կերպ չի կարող անդրադառնալ էդ ամենի վրա:
– Քանի որ Դուք ժամանակ առաջ ընդդիմադիր հայացքներ ունեիք, հետո փոխեցիք Ձեր հայացքները:
– Ես միշտ երկրապահ եմ եղել, ԵԿՄ-ի հետ եմ եղել, զբաղվել եմ ԵԿՄ-ի գործերով: Ես ինձ երբեք որևէ անգամ արհեստավարժ կուսակցական չեմ համարել, չեմ համարելու:
