Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում այսօր շարունակվել է «Մատաղիսի» գործով արդարացվածներն ընդդեմ Գագիկ Ջհանգիրյանի գործով դատաքննությունը: Նիստի ընթացքում հայցվորներ Արայիկ Զալյանը, Մուսա Սերոբյանը, Ռազմիկ Սարգսյանը պնդել են իրենց բողոքը:
Գագիկ Ջհանգիրյանը դատական նիստին ներկա չի եղել:
Դատարանը որոշել է նախ լսել հայցվորներին, պատասխանողին, ապա հետազոտել գործի ապացույցները:
Նիստի ընթացքում Արայիկ Զալյանը ներկայացրել է հայցը: Արայիկ Զալյանը նշել է, որ պահանջում են իրենց վիրավորելու համար Գագիկ Ջհանգիրյանից բռնագանձել 300.000 դրամ, զրպարտության համար՝ ևս 300.000 դրամ, ճանաչել անմեղության կանխավարկածի խախտումը:
Ջհանգիրյանի ներկայացուցիչն ասել է, որ հայցը անհիմն է և ենթակա է մերժման՝ պատճառաբանելով, որ հայցվորների անուն-ազգանունները Ջհանգիրյանի կողմից չեն նշվում:
Հիշեցնենք, որ 2012 թ. դեկտեմբերի 18-ին Մատաղիսի գործով ՀՀ Շիրակի մարզի ընդհանուր իրավասության դատարանի կողմից կայացված արդարացման դատավճռից հետո Գագիկ Ջհանգիրյանը հայտնել է. «Մարդասպանները պետք է նստեն, ես մնում եմ իմ կարծիքին», «Դրանք մարդասպան են», «Դրանք մարդասպաններ են և պետք է դատվեն, ես չեմ փոխել իմ կարծիքը»:
Արայիկ Զալյանը, Մուսա Սերոբյանը և Ռազմիկ Սարգսյանը պահանջում են Գագիկ Ջհանգիրյանից իրենց պատվին, արժանապատվությանը և գործարար համբավին պատճառված վնասի հատուցում և հրապարակային ներողություն:
Հաջորդ դատական նիստը տեղի կունենա հուլիսի 2-ին, որտեղ կհետազոտվեն գործով ապացույցները:
