Ֆինանսների նախարարության Վերահսկողական վարչությունը առողջապահության ոլորտում ուսումնասիրություններ անցկացնելով՝ պարզել է, որ պետպատվերով բուժվողների համար պետության հատկացրած գումարներն իրենց նպատակին գրեթե չեն ծառայում. «Ստուգման նպատակն էր՝ հիվանդանոցներին պետական պատվերի շրջանակում պետական միջոցների բաշխումը: Արձանագրվեց, որ այն խիստ թերի է կանոնակարգված»,- լրագրողների հետ հանդիպմանն ասաց վարչության պետ Սոնա Ղարիբյանը:
Նա նշեց, որ բոլոր հիվանդանոցներում հիվանդի բուժման համար ներառված է սննդի գումար, բայց ընդամենը երկու-երեք հիվանդանոց է սննդով ապահովում հիվանդներին. «Պարզվում է, որ 513 մլն դրամ ծախսվել է ոչ սննդի վրա: Արդյունքում որոշվել է չֆինանսավորել այն հիվանդանոցները, որոնք սնունդ չեն տալիս»:
Բացի այդ, բանախոսը նշեց, որ այն հիվանդները, որոնք պետք է բուժվեն 24 օր, բուժվել են 20-50 օր, իսկ պետպատվերի շրջանակներում բուժման կուրս անցնող հիվանդներին ժամանակից շուտ են դուրս գրել հիվանդանոցներից. «Արդյունքում 180 մլն դրամ ավելի գումար է ծախսվել հիվանդի բուժման համար, հետևաբար անցում է կատարվել մեկ օրվա հաշվարկով ֆինանսավորումից դեպի այլ համակարգի, այն է՝ քանի օր բուժվում է, այդքան օրվա համար պետական գումար կհատկացվի: Այդպիսով 230 մլն դրամ արդեն տնտեսել ենք: Բացի այդ, տվյալ հիվանդանոցը եթե նախկինում 5 տոկսով էր պատժվում, ապա այժմ՝ 25»:
