Վերահսկիչ պալատի նախագահ Իշխան Զաքարյանը վերջին 9 ամիսների ընթացքում ավարտին է հասցրել իր շքեղ առանձնատան շինարարությունը, բայց նրա կենսագրության մեջ չեք գտնի մի դրվագ, որը կարդարացնի այդ՝ մի քանի միլիոն դոլար արժողությամբ առանձնատուն ունենալու փաստը: Սա ստիպում է մտածել կոռուպցիոն ռիսկերի մասին: Այս մասին այսօր ՀՀ Ազգային ժողովի արտահերթ նիստում հայտարարեց ՀԱԿ պատգամավոր Նիկոլ Փաշինյանը՝ հավելելով, որ իշխանավորները թալանում են հասարակ ժողովրդին:
«Վերահսկիչ պալատի բացահայտումները վերաբերում են Տիգրան Սարգսյանի կառավարությանը, ով ևս առիթը բաց չի թողնում բարձրագոչ խոսել կոռուպցիայի մասին: Այս իշխանություններն, առհասարակ, երկվության խնդիր ունեն: Նրանք, որ 2008-ի մարտի 1-ին կրակեցին ժողովրդի վրա, միաժամանակ ձգտում են բացահայտել այդ իրադարձությունները: Սպանությունները բացահայտված չեն՝ այն դեպքում, երբ հայտնի են դրանք կատարողների անուններն ու հասցեները: Նրանք, որ խոսում են կոռուպցիայի մասին, միաժամանակ իբրև թե աշխատում են պայքարել այդ երևույթի դեմ: Մի խոսքով, իշխանությունները, այսպես ասած, գոլորշի են բաց թողնում»:,- ասաց Փաշինյանը:
ՀԱԿ պատգամավորն անդրադարձավ նաև Սերժ Սարգսյանի եղբոր՝ Ալեքսանդր Սարգսյանի, ինչպես նաև Վատիկանում ՀՀ արտակարգ և լիազոր դեսպան, Սերժ Սարգսյանի փեսա Միքայել Մինասյանի կարողության հարցին: «Սարգսյանների ընտանիքի անդամ դառնալուց հետո վերջինս միանգամից դարձավ միլիարդատեր, նշանակվեց Վատիկանում ՀՀ դեսպան: Ընդ որում, այդ դեսպանատունը բացվել է մեր ժողովրդի միջոցների հաշվին: Այդ դեսպանատունը բացվել է միայն նրա համար, որ Սերժ Սարգսյանի ընտանիքի անդամները կարողանան լուսանկարվել Հռոմի պապի հետ և նրա հետ բարձրաշխարհիկ զրույցներ վարեն»,- ամփոփեց Նիկոլ Փաշինյանը:
