Իրանի միջուկային ծրագրի հարցերով նախկին բանագնաց, Ազգային անվտանգության գերագույն խորհրդի նախկին քարտուղար Հասան Ռուհանին նախագահական ընտրությունների արդյունքներով առաջատարն է: Ձայների ավելի քան 20%-ի (8 միլիոն քվեաթերթիկ) հաշվարկի արդյունքներով Ռուհանին հավաքել է 51.2% (4.12 միլիոն ձայն): Ինչպես հաղորդում է ITAR-TASS-ը, նման տվյալներ է հաղորդել Իրանի ՆԳՆ-ն:
Հասան Ռուհանին 65 տարեկան է: Նա կենտրոնական դիրքորոշում ունի, համարվում է ճկուն քաղաքական գործիչ, որը փորձում է փոխզիջում գտնել Արևմուտքի հետ: Նրան աջակցում է գերագույն հոգևորականությունը: Ռուհանին խոստացել է ընտրվելու դեպքում մշակել «Քաղաքացիական ազատությունների խարտիա»:
Նախագահական ընտրությունների նախօրեին թեկնածուն հայտարարել է` «Իմ նպատակն է վերականգնել տնտեսությունը, ապահովել բարոյականություն և փոխհամագործակցություն մնացած աշխարհի հետ»:
Նշենք, որ Իրանի նախագահական ընտրություններին մասնակցությունը կազմել է 80%: Մյուս թեկնածուները` Թեհրանի քաղաքապետ Մուհամադ Բաղեր Ղալիբաֆը ստացել է ձայների շուրջ 17%-ը, Ազգային անվտանգության գերագույն խորհրդի քարտուղար, իրանական միջուկային ծրագրի հարցով գլխավոր բանագնաց Սաիդ Ջալիլին` 13.1%-ը, Նպատակահարմարության խորհրդի քարտուղար Մեհսեն Ռեզաին` 13%-ը, ԱԳ նախկին նախարար Ալի Աքբար Վելայաթին` 6%-ը և փոստի, հեռագրության, հեռախոսի նախկին նախարար Սաիդ Մուհամադ Ղարազին` 1%-ը:
Եթե Ռուհանիին չհաջողվի պահպանել հավաքած տեմպը և վերջնական հաշվարկի արդյունքներով չհավաքի ձայների ավելի քան 50%-ը, ապա հունիսի 21-ին կկայանա ընտրությունների երկրորդ փուլը:
Փորձագետների կարծիքով` քվեարկության ելքը չի ազդի ներքին և արտաքին քաղաքականության առանցքային հարցերի վերաբերյալ Թեհրանի դիրքորոշման վրա: Բոլոր թեկնածուները հանդես են եկել միջուկային ծրագրի շարունակության օգտին և դրա հետ մեկտեղ ընդունել են «Վեցյակի» և ԱԷՄԳ-ի հետ պայմանավորվածություն ձեռք բերելու անհրաժեշտությունը:
