Բրիտանական իշխանությունները մտադիր են բյուջեից մեկ միլիոն ֆունտ ստեռլինգ վճարել նրան, ով կկարողանա լուծել մարդկության առջև ծառացած խնդիրներից գլխավորը: Այս մասին հայտնում է The Daily Telegraph-ը և հավելում, որ վարչապետ Դևիդ Քեմերոնը խնդրի սահմանման համար կհիմնի հատուկ կոմիտե:
Այդ կոմիտեն, որը կգլխավորի թագավորական աստղագետ Մարտին Ջոն Ռիսը, կոչվում է «Երկայնության կոմիտե» (Longitude Committee): Քեմերոնի կառավարությունն այդ կերպ ցանկանում է ցույց տալ, որ մրցանակաբաշխությունը կազմակերպվում է XVIII դարում հիմնված «Երկայնության մրցանակի» օրինակով:
Պարբերականի տվյալներով՝ Քեմերոնը մրցույթի մասին կհայտարարի հունիսի 17-18-ին Հյուսիսային Իռլանդիայում կայանալիք G8 գագաթնաժողովին:
Բրիտանական խորհրդարանը 1714 թվականին «Երկայնության մրցանակ» էր խոստացել այն մարդուն, ով կկարողանար մշակել ծովային ուղևորությունների ժամանակ աշխարհագրական երկայնությունը սահմանող մեթոդ: Մրցությում հաղթող դարձավ ինքնուս գյուտարար Ջոն Հարիսոնը՝ ստեղծելով ծովային ժամանակաչափ:
Կոմիտեն կկազմի ժամանակակից համաշխարհային խնդիրների համառոտ ցուցակը, որից հետո ցանկացողները կսկսեն խնդիրներին լուծում փնտրել:
