Թեպետ Արմավիրի մարզի՝ կարկուտից տուժած մի շարք գյուղերի բնակիչները շարունակում են դժգոհել, այդուհանդերձ, գյուղապետերը մեզ հետ զրույցում վստահեցնում են, թե իրավիճակը վերահսկվում է, և կամաց-կամաց ամեն բան կընկնի իր տեղը։ «Յուրաքանչյուր կազմակերպություն ինչ ծրագիր որ մեզ ներկայացրել է, որով կփորձի օգնել՝ կամաց-կամաց արվում է: Գյուղացիները եթե գոհ էլ չեն, գյուղապետարանն ունի այն պատիվը, որ կարողանում ենք սսկացնել, հանդարտացնել ժողովրդին, բայց դե այնքան շատ է վնասը, որ արդեն համակերեպվել են»,- մեզ հետ զրույցում ասաց Նոր Արտագերսի գյուղապետ Սամվել Հակոբյանը։ Ըստ նրա՝ «թեժ գծի» հեռախոսահամարը գյուղում փակցված է, բոլոր հարցերը շտկվում են. «Դե, հիմա վարկերի հետ կապված էլ՝ ովքեր ունակ են վճարելու՝ կվճարեն, ովքեր չէ՝ դեռ կտեսնենք։ Ամեն ինչ խաղաղվում է, համակերպվել են գյուղացիները՝ ի՞նչ անեն հիմա մարդիկ»:
Նալբանդյանի գյուղապետ Գրիգոր Մկրտչյանը ևս մեզ հետ զրույցում նշեց, որ իրենք փորձում են անել հնարավորինս գյուղացիներին հանդարտեցնելու համար. «Դե, գիտեք՝ մարդիկ միշտ էլ դժգոհ են, ինչ ասեմ, կամ էլ ինչ անի էս պետությունը, հիմա էլ 50․000 դրամ սոցիալապես անապահով ընտանիքներին են տալիս, բայց կռիվ են անում թե բոլորին հավասարաչափ տվեք։ Դե, տենց ոնց կլինի, սալյառկա էլ… մի խոսքով՝ դուրս կգանք էլի այս վիճակից»:
Գյուղապետի խոսքերով՝ դժգոհող մարդիկ միշտ էլ դժգոհում են, իսկ նրանք ովքեր արդեն համակերպվել են իրավիճակին, լուռ անցել են իրենց գործին:
Նշենք, որ հատկապես Նալբանդյան գյուղը կարկտահարությունից կրել էր գրեթե 100 տոկոսի վնաս: Ինչպես մեզ հետ զրույցում ասաց գյուղի բնակիչներից մեկը, դժվար էլ բերք ունենան մոտ ապագայում, մտածում են ուրիշ ինչ կարող են անել, որպեսզի կարողանան ապրել, քանզի գոյատևման միակ միջոցը դա էր:
«Առաջին լրատվականն»-ն ավելի վաղ նշել էր, որ մեր տեղեկություններով՝ վարկային կազմակերպությունները թեև խոստացել են, բայց չեն աջակցում կարկտահարությունից տուժած գյուղացիներին:
Այնինչ գյուղապետերը նշում են, թե ամեն ինչ նորմալ է, ով խոստացել է օգնել՝ օգնում է, և իրավիճակն էլ գյուղերում հանդարտ է:
