ԱՄՆ-ը պետք է չսահմանափակի սիրիական ընդդիմության օգնության ծավալի մեծացումը, ձեռնարկի ռազմական օպերացիա, թևավոր հրթիռներով հարվածներ հասցնի Սիրիայի կառավարական զորքերին՝ կարծում են հանրապետական սենատորներ Ջոն Մաքքեյնն ու Լինդսի Գրեմը: Այս մասին հայտնում է RIA Novosti-ն:
Սպիտակ տունը հինգշաբթի հայտարարել է, որ ստացվել են սիրիական կառավարական զորքերի կողմից քիմիական զենքի կիրառման նոր ապացույցներ: Ամերիկյան կողմի տվյալներով՝ Սիրիայում դրա կիրառման հետևանքով զոհվել է 150 մարդ: ԱՄՆ նախագահ Բարաք Օբաման որոշել է սիրիական ընդդիմությանը ռազմական աջակցություն ցուցաբերել՝ հայտարարել է ազգային անվտանգության հարցերով Օբամայի խորհրդականի տեղակալ Բեն Ռոդսը՝ չհստակեցնելով, թե զենքի մատակարարումներ լինելո՞ւ են, թե՞ ոչ:
Մաքքեյնի և Գրեմի համատեղ հայտարարության մեջ ասվում է, որ միայն զենքի մատակարարումները բավարար չեն հավասարակշռությունը փոխելու համար, դրա համար պետք է նախագահը միջազգային կոալիցիա ստեղծի՝ ռազմական միջոցառումներ ձեռնարկելու և Ասադին ավիացիա ու բալիստիկ հրթիռներ կիրառելու հնարավորությունից զրկելու համար:
Ավելի քան երկու տարի Սիրիայի կառավարական զորքերի և զինված ընդդիմության միջև շարունակվող հակամարտության ընթացքում զոհվել է ավելի քան 90 հազար մարդ:
