Իրանի Իսլամական Հանրապետության գերագույն առաջնորդ այաթոլլա Ալի Խամենեին քվեարկել է ընտրական տեղամասերի բացման առաջին իսկ րոպեներին, հաղորդում է ITAR-TASS-ը:
«Հույս ունեմ, որ բոլորը կմասնակցեն (ընտրություններին-1in.am),- ասել է այաթոլլան լրագրողներին՝ քվեաթերթիկը գցելով տուփի մեջ:- Բոլորին խորհուրդ եմ տալիս գալ և քվեարկել՝ չհետաձգելով դա մինչև վերջին պահը»:
«Ես քվեարկել եմ թեկնածուներից մեկի օգտին, բայց ոչ մեկին, անգամ ընտանիքիս, չեմ ասել թե ում օգտին,- շարունակել է Խամենեին՝ հավելելով, որ ընտրական տեղամասերի բոլոր աշխատակիցները հանդիսանում են ժողովրդի ձայնի յուրօրինակ պահապաններ և անհրաժեշտ է զգոնություն ցուցաբերել և թույլ չտալ լցոնումներ ու խախտումներ:
Այսօր Իրանում տեղի ժամանակով 8:00-ին բացվել են շուրջ 60 հազար ընտրատեղամասեր: Քվեարկությունը կշարունակվի մինչև 18:00-ն: Քվեարկությանը կարող է մասնակցել շուրջ 50.5 մլն իրանցի: Ընտրություններում առաջադրվել է 6 թեկնածու՝ 4 պահպանողական և 2 կենտրոնի ներկայացուցիչ:
Իրանում նախագահական ընտրությունները տեղի են ունենում յուրաքանչյուր 4 տարին մեկ: Երկրի սահմանադրության համաձայն՝ գործող նախագահ Մահմուդ Ահմադինեժադը չի կարող առաջադրվել երրորդ ժամկետով:
