Մինչ վարչապետ Տիգրան Սարգսյանը հետևողական հերքում է ՀՌԱԿ կուսակցության պառակտման մեջ իրեն ուղղված մեղադրանքները , պարզվում է` ՀՀ կառավարությունը որոշել է կես գնից պակաս գումարով ուղղակի վաճառքով ՀՌԱԿ-ին վաճառել Կենտրոնի հուշարձանային շինություն համարվող 843.83 քառ. մետր ընդհանուր մակերեսով շենքը, որը գտնվում է Կորյունի 19ա հասցեում:
Կառավարության նիստում պետգույքի կառավարման վարչության պետ Արման Սահակյանը երեկ նախագիծ ներկայացրեց, ըստ որի` 2013 թվականի մարտի 13-ի դրությամբ վաճառվող գույքի գնահատված արժեքը` 755 մլն 633 հազ. դրամ է` մոտ 1.8 մլն դոլար, իսկ ուղղակի վաճառքի ձևով օտարման ենթակա գույքի վաճառքի գինը, ներառյալ հողի կադաստրային արժեքը և գույքի արժեքի որոշման գումարը 700 000 ԱՄՆ դոլարին համարժեք դրամ, հաշվարկված վճարման օրվա դրությամբ` Հայաստանի Հանրապետության կենտրոնական բանկի կողմից սահմանված փոխարժեքի չափով: Ըս նախագծի` գնորդին է օտարվում նաև գույքի զբաղեցրած, օգտագործման ու սպասարկման համար անհրաժեշտ 0.063 հա հողամասը՝ 37800.0 հազ. դրամ կադաստրային արժեքով. գնորդը պարտավոր է վճարել գույքի արժեքի որոշման համար նախատեսված գումարը` 238519 ՀՀ դրամը:
3. Հայաստանի Հանրապետության կառավարությանն առընթեր պետական գույքի կառավարման վարչության պետին` գնորդի կողմից սույն որոշման 2-րդ կետի 2-րդ ենթակետում նշված գումարն ամբողջությամբ վճարելուց հետո՝ մեկամսյա ժամկետում գնորդի հետ կնքել առուվաճառքի պայմանագիր` դրանում նախատեսելով, որ գնորդը պարտավորվում է`
1) պայմանագրի կնքման պահից 18 ամսվա ընթացքում Երևան քաղաքի Հանրապետության 47 հասցեում գտնվող շենքի վերանորոգման և բարեկարգման նպատակով կատարել 800 000 ԱՄՆ դոլարին համարժեք Հայաստանի Հանրապետության դրամի ներդրում, որից 400 000 ԱՄՆ դոլարին համարժեք Հայաստանի Հանրապետության դրամը առաջին 9 ամսում, իսկ մնացածը՝ հաջորդ 9 ամիսների ընթացքում:
2) իր միջոցների հաշվին վճարել գույքային իրավունքների պետական գրանցման համար օրենքով սահմանված գումարներն ու տուրքերը,
3) գույքի օգտագործման նպատակի և բնույթի փոփոխումները համաձայնեցնել պատմության և մշակույթի հուշարձանների պահպանության բնագավառում լիազորված մարմնի հետ:
4) Գնորդը պարտավոր է վճարումները կատարել երկամսյա ժամկետում, Հայաստանի Հանրապետության արժույթով` գույքի վաճառքի գնի 70 տոկոսն ուղղելով Հայաստանի Հանրապետության պետական բյուջե, 30 տոկոսը` համապատասխան համայնքի ֆոնդային բյուջե` ըստ գույքի գտնվելու վայրի, իսկ հողամասի կադաստրային արժեքը` վճարել «Շենքերի և շինությունների օտարման գործընթացում պետական սեփականություն հանդիսացող հողերի օտարումից մուտքեր» գանձապետական հաշվին:
