Գորիսի նախկին քաղաքապետ Սամվել Հարությունյանը շարունակում է Aravot.am-ին ներկայացնել Սյունիքի նախկին մարզպետ Սուրիկ Խաչատրյանին վերաբերող իր բացահայտումների շարքը:
«1991 թվականին իմ քաղաքապետ ընտրվելուց առաջ, Գորիսի քաղխորհրդի գործկոմը 600 քմ հողատարածք է հատկացնում քաղաքի կենտրոնական մասերից մեկում՝ Դավիթ Բեկ հատվածում մինչ այդ չորս անգամ դատապարտված Սուրիկ Խաչատրյանին: Նա մինչև այդ ուներ 2 սենյականոց բնակարան և մեկ ժիգուլի՝ 06: Երբ ընտրվեցի քաղխորհրդի գործկոմի նախագահ, դրանից կարճ ժամանակ անց, Սուրիկ Խաչատրյանը արդեն որպես գումարտակի հրամանատար, ներկայացավ ու խնդրեց ավելացնեմ իր այդ 600 քմ հողատարածքը հարևանների հողատարածքների հաշվին:
Մերժեցի իր բանավոր դիմումը, բայց ինչպես հետո պարզվեց՝ այդ 600 քմ տարածքը մի քանի անգամ ավելացրեց հարևանների հաշվին: Կարճ ժամանակ անց նա սկսում է Գորիսի իր ներկայիս ապարանքի շինարարությունը: Բոլորը գիտեն, որ այդ ապարանքի շինարարության վրա մի քանի հազար գծամետր սրբատաշ բազալտ է օգտագործվել, որի համար հատուկ հանք էին բացել: Այդ հանքը բացել էին այդ ժամանակ Գորիսում Գրիգոր Լուսավորիչ եկեղեցու կառուցվող գմբեթի համար: Իմ ժամանակ դեռևս դժվարությամբ ֆինանսական միջոցներ հատկացրինք, որ շինարարությունը կարողանանք ավարտին հասցնել:
Սուրիկ Խաչատրյանը թե՛ քաղաքային ֆինանսական միջոցները, թե՛ առանձին հիմնարկների, գործարարների ու քաղաքացիների նվիրատվությունները օգտագործելուց հետո, տեսնում ենք, որ տասնապատիկ ավելի սրբատաշ այդ նույն բազալտից օգտագործում է իր ապարանքի շինարարության վրա: Այդ ընթացքում փակում է Դավիթ Բեկ փողոցի մի հատվածը , պարսպապատում է և դարձնում իր առանձնատան բակ: Հետո իր կալվածքին միացնում է իր տան դիմաց գտնվող Գորիսի նորակառույց քաղաքային բաղնիքը: 90-ականների առաջին տարիներին՝ պատերազմի ժամանակ, մենք դժվարությամբ միջոցներ էինք հայթայթում բաղնիքի շինարարությունն ավարտին հասցնելու համար, որ գորիսեցիները, բաղնիքներ չունեցող անձինք հնարավորություն ունենան հարմարավետ բաղնիքում լողանալ: Այդ բաղնիքի շենքը սրբատաշ բազալտից է: Դրա վրա ծախսվել են հսկայական պետական միջոցներ: Այսօր 400. 000 դոլարով չես կարող նման շենք կառուցել»,- Aravot.am-ին պատմել է Գորիսի նախկին քաղաքապետը:
Նրա խոսքերով, Սուրիկ Խաչատրյանը Գորիսի իր առանձնատան ներսում էլ անթույլատրելի ճանապարհով օգտագործել է աշխարհի ամենաթանկ փայտանյութը. «Հսկայական փայտանյութ է օգտագործվել, որն աշխարհի ամենաթանկ փայտանյութն է:
Խոսքը Մարտակերտի անտառում շատ քիչ հանդիպող կարմիր ծառերի մասին է, որոնք համաշխարհային բնաշխարհի կարմիր գրքում են գտնվում»:
Aravot.am-ը պատրաստ է լսել Սյունիքի նախկին մարզպետ Սուրիկ Խաչատրյանին, բայց նա Գորիսում տեղի ունեցած դեպքից հետո անջատել է իր հեռախոսը:
Լուսանկարը՝ Shamshyan.com-ի
