Այսօր տաքսու մի շարք վարորդներ անցկացրեցին բողոքի ակցիա՝ կառավարությունից պահանջելով վերացնել բոլոր տեսակի տուգանքները, որոնցով ընդամենը մտնում են մարդկանց գրպանները, իսկ այդ գումարները չեն ուղղում ռազմավարական նշանակություն ունեցող հարցերի լուծմանը:
«Այս իրավիճակում պետք է հասկանանք, որ տեսախցիկները և կարմիր գծերը պետք է մեր կյանքից վերանան»,- հայտարարեց «Ավտովարորդների պաշտպանության լիգայի» նախագահ Տիգրան Հովհաննիսյանը՝ հավելելով, որ տրանսպորտի ոլորտն առհասարակ կանոնակարգման կարիք ունի: Դրանց շարքում առաջնահերթերից են նաև տաքսիների լիցենզավորման հետ կապված հարցերը։
Ակցիայի մասնակիցները նաև պնդում էին, որ 50 հազար դրամի չափով տուգանում են ոչ միայն չլիցենզավորված, այլև անգամ լիցենզավորված տաքսիների պարագայում. «Ամբողջ տեսչությունը դարձրել են ֆոտոսեսիայի անդամներ, իսկ գումարները հոշոտվում են. 2-3 հազար դրամով աշխատողից ի՞նչ մաթեմատիկական հաշվարկով են 50 հազար տուգանք պահանջում: Որ ասում ես, ասում են՝ բանակ ենք պահում, բայց ո՞ւր են գումարները»,- հարցադրում արեցին նրանք։
Վարորդները նաև հորդորեցին վարչապետին, նախարարներին և պատգամավորներին, դատախազներին ու նրանց երեխաներին, հարազատներին ուղարկել առաջին գիծ և կրճատել ծախսերը, վաճառել ջիպերն ու վիլլաները՝ տանկեր գնել։
Մանրամասները՝ տեսանյութում:
