Սիրիայի կառավարության կողմից հրադադարի խախտումը կարող է հանգեցնել հրադադարի ամբողջական դադարեցման և պատերազմի վերսկսման: Այս մասին հայտարարել է ԱՄՆ պետքարտուղար Ջոն Քերին՝ փոխանցում է RIA Novosti-ն։
«Գիծը, որը (կողմերը) փորձում են մշակել, տանում է Հալեպում ցանկացած ներխուժումների արգելման։ Եվ եթե Ասադը չհետևի դրան, դա կդառնա հերթական խախտում և կարող է հանգեցնել հրադադարի ռեժիմի լիակատար վերացման ու պատերազմի վերադարձի։ Ես չեմ կարծում, թե Ռուսաստանը ցանկանում է դա»,- ասել է Քերին։
Երեքշաբթի Սիրիայի ԱԳՆ-ն ՄԱԿ-ի գլխավոր քարտուղարին և ՄԱԿ ԱԽ-ին հղված ուղերձում հայտարարել էր, որ ահաբեկչական խմբավորումները՝ երեքշաբթի ձեռնարկելով Հալեպի վրա հզոր հարձակում, կործանել են «լռության ռեժիմի» հաստատման գործընթացը։
Ավելի վաղ Ռուսաստանի արտգործնախարար Սերգեյ Լավրովը Սիրիայի հարցով ՄԱԿ-ի հատուկ բանագնաց Ստաֆան դե Միստուրայի հետ մամլո ասուլիսում հայտարարել էր, որ Ռուսաստանն ու ԱՄՆ-ը պայմանավորվել են առաջիկայում Հալեպում կրակի դադարեցման ռեժիմ հայտարարելու հնարավորության վերաբերյալ։
