Ռուսաստանի դեմ սահմանված պատժամիջոցները սահմանափակել են նավթի գների անկմանը հարմարվելու նրա ունակությունը: TASS-ի հաղորդմամբ՝ այս մասին ասել է ԱՄՆ նախագահի վարչակազմի պաշտոնական ներկայացուցիչ Ջոշ Էռնեստը:
Նա նշել է, որ ԱՄՆ-ը և նրա եվրոպական դաշնակիցները արդյունավետորեն համակարգել են Մոսկվայի դեմ պատժամիջոցների սահմանումը: «Դա բացասական ազդեցություն է ունեցել նրանց (Ռուսաստանի) տնտեսության վրա»,- ասել է Էռնեստը:
Սպիտակ տան ներկայացուցիչը վստահություն է հայտնել, որ Ռուսաստանի տնտեսական խնդիրների գլխավոր պատճառներից մեկը էներգակիրների գնի անկումն է: «Բայց դրան արձագանքելու Ռուսաստանի տնտեսության ունակությունը սահմանափակված է եղել պատժամիջոցներով»,- հավելել է նա:
Միաժամանակ Էռնեստը հայտարարել է, որ առայժմ Վաշինգտոնը չի տեսնում Մոսկվայի ռազմավարության այն փոփոխությունը, որն ինքն ակնկալում էր, և վստահեցրել է, որ ԱՄՆ-ը պատրաստ է թուլացնել պատժամիջոցները, «երբ Ռուսաստանը ցուցաբերի բանակցությունների ժամանակ իր ստանձնած պարտավորությունները կատարելու ձգտում»:
