ՄԱԿ-ի նյույորքյան կենտրոնակայանում բրիտանական «Konkordia Forum»-ի կազմակերպած` «Հանուն փոփոխությունների ֆորում» խորագրով միջոցառման ժամանակ, որին մասնակցել են աշխարհի տարբեր երկրներից ժամանած մոտ 200 ճանաչված դեմքեր, քաղաքական-հասարակական և գլոբալ հարցերին զուգահեռ խոսել են նաև Ադրբեջանում տիրող բռնապետությունից: Այս մասին հայտնում է «Ազադլըգ» թերթը։
Ըստ թերթի`ֆորումին մասնակցել է նաև ծագումով ադրբեջանցի ամերիկաբնակ հասարակական-քաղաքական ակտիվիստ Էմիլ Իսմայիլը, որը ԱՄՆ կոնգրեսականներ Քեյթ Էլիսոնի և Իվետ Կլարկի հետ զրույցում քննարկել է Ադրբեջանում ժողովրդավարության վիճակը, մարդու իրավունքների խախտումների ու ապօրինի ձերբակալությունների հետ կապված հարցեր:
ԱՄՆ-ի նախագահի թեկնածու Հիլարի Քլինթոնի «աջ ձեռք» համարվող Հումա Աբեդինի հետ զրույցում Էմիլ Իսմայիլը նրանից խնդրել է Հիլարի Քլինթոնի նախագահ ընտրվելու դեպքում ժողովրդավարության և մարդու իրավունքների բնագավառում լինել ադրբեջանցի ժողովրդի կողքին:
Էմիլ Իսմայիլը Հումա Աբեդինին տեղեկացրել է Ադրբեջանում քաղբանտարկյալների խնդրի, ապօրինի դատարանների և ընդդիմության առաջնորդների նկատմամբ հետապնդումների մասին:
Ֆորումի ժամանակ ադրբեջանցի ակտիվիստն Ադրբեջանում մարդու իրավունքների աղետալի վիճակը քննարկել է նաև «Ալ Ջազիրա» հեռուստաալիքի հայտնի հաղորդավար Մեհդի Հասսանի հետ: Հասսանից նա խնդրել է իր հաղորդումներում ուշադրություն դարձնել Ադրբեջանում ապօրինի ձերբակալությունների և ժողովրդավարության հարցերին:
Մեհդի Հասսանն իր հերթին ասել է, որ տեղեկացված է Ադրբեջանում բռնապետություն լինելու մասին և ափսոսանք հայտնել, որ նման պայմաններում ԱՄՆ-ը ջերմ հարաբերություններ ունի Ադրբեջանի բռնապետ Իլհամ Ալիևի ռեժիմի հետ:
Նա նաև հայտնել է, որ «Ալ Ջազիրա» հեռուստաալիքում ավելի շատ ուշադրություն է հատկացնելու Ադրբեջանի հետ կապված հարցերին:
Ադրբեջանցի ակտիվիստը ֆորումի ժամանակ հանդիպել և Ադրբեջանում բռնապետական ռեժիմի մասին զրուցել է նաև Բրուքլինի քաղաքապետ Էրիկ Ադամսի, ԱՄՆ-ի ազգային անվտանգության դեպարտամենտի և ԱՄՆ-ի պետքարտուղարության բարձրաստիճան աշխատակիցների ու «Coca Cola International» ընկերության նախագահ Ահմեթ Բոզորի հետ:
